कल्याणपुर समाचारदाता
कल्याणपुर (सप्तरी), चैत २० गते । नेपाल पत्रकार महासङ्घ सप्तरीले पत्रकार र सञ्चारगृहको सुरक्षामा राज्यको दायित्व विषयमा पेसागत सङ्घ सङ्गठनसँग अन्तरक्रिया गरेको छ ।
शुक्रबार काठमाडौँमा मारिएका पत्रकार सुरेश रजक र सञ्चारगृहमा भएको आक्रमणविरुद्ध आन्दोलनमा उत्रेका पत्रकार महासङ्घले मङ्गलबार पेसागत सङ्घ सङ्गठनसँग अन्तरक्रियाको आयोजना गरेको हो । अन्तव्रिर्mयामा वक्ताले पत्रकारको सुरक्षाका लागि राज्यले छुट्टै कानुन ल्याउनुपर्नेमा जोड दिनुभएको छ ।
परिवर्तनको हरेक आन्दोलनमा अग्रणी भूमिका निर्वाह गर्दै आएका पत्रकारमाथि पटक पटक आक्रमण हुँदै आएकाले उनीहरूको सुरक्षाका लागि छुट्टै कडा कानुन ल्याउनुपर्नेमा वक्ताले जोड दिनुभएको हो । कार्यक्रममा बोल्नुहुँदै सप्तरी जिल्ला बार एसोसिएसनका सचिव रामएकवाल मण्डलले जनताको मौलिक हक र मानव अधिकारको संरक्षणमा अग्रणी भूमिका निर्वाह गर्दै आएको सञ्चारकर्मीको सुरक्षाका लागि छुट्टै कानुन ल्याउनु आवश्यक रहेको बताउनुभयो ।
उहाँले सञ्चारकर्मीले अराजकता र भ्रष्टाचारविरुद्ध कलम चलाउने गरेकै कारण असुरक्षित हुँदै गएकाले कानुन ल्याउन सरकारसँग माग गर्नुभयो । प्रजातान्त्रिक प्राध्यापक सङ्घका अध्यक्ष उमेशकुमार यादवले जनतालाई सूचना समाचार दिन अहोरात्र खटिने पत्रकारलाई सुरक्षा दिन राज्यसँग माग गर्नुभएको छ । गणतन्त्र स्थापनाका लागि पत्रकारले निर्वाह गरेको भूमिका स्मरण गर्दै उहाँले पत्रकारको सुरक्षाप्रति संवेदनशील भएर राज्यले कानुन ल्याउनुपर्ने बताउनुभयो ।
नेपाल पत्रकार महासङ्घ सप्तरीका पूर्वअध्यक्ष एवं प्रेस स्वतन्त्रता सेनानी वैद्यनाथ झाले छुट्टै कानुन नआएसम्म सञ्चारकर्मी असुरक्षित रहनुका साथै यस्ता घटना भइरहने भएकाले सरकारसँग आफ्नो दायित्व निर्वाह गर्न माग गर्नुभयो ।
महासङ्घका पूर्वअध्यक्ष मुरलीप्रसाद यादवले सुरेश रजकको निर्मम हत्या भए पनि अहिलेसम्म संलग्न व्यक्ति पक्राउ नपर्नु राज्यको कमजोरी बताउनुभयोे । पत्रकार लोकतन्त्रको पहरेदार भएकै कारण अराजकतावादीले पत्रकार र सञ्चारगृहमा आक्रमण गरेको पत्रकार एवं अधिकारकर्मी मनोहर पोखरेलको भनाइ छ ।
