कास्की समाचारदाता
कास्की, चैत ९ गते । मतपत्र त्रुटिका कारण रोकिएको पोखराको पृथ्वीनारायण क्याम्पसको स्वतन्त्र विद्यार्थी युनियन (स्ववियु) निर्वाचन आइतबार हुने भएको छ । निर्वाचन समिति, क्याम्पस प्रशासन र निर्वाचनमा भाग लिएका विभिन्न सङ्घ, सङ्गठन, प्यानल र स्वतन्त्र उम्मेदवारसहित बसेको सर्वपक्षीय बैठकले स्थगित निर्वाचन चैत १० गते बिहान आठ बजेदेखि गर्ने निर्णय गरेको हो ।
निर्वाचन समिति संयोजक प्राडा रामचन्द्र पोखरेलले विज्ञप्ति जारी गरी १० गते बिहान ८ बजेबाट दिउँसो ४ बजेसम्म क्याम्पसपरिसरभित्र मतदान हुने बताउनुभएको छ । निर्वाचनका लागि २०८१ सालको चैत ७ गते राति १२ बजेदेखि मौन अवधि लागु हुने छ । नौ हजार २७० जना विद्यार्थी मतदाता रहेका छन् । पृथ्वीनारायण क्याम्पसमा मङ्गलबार निर्वाचन समितिले छापेको मतपत्रमा अखिल छैटौँका उम्मेदवारको सूची नदेखिएपछि विवाद हुँदा चुनाव स्थगित भएको थियो ।
२०६५ सालपछि हुन लागेको पिएनको २२ औँ स्ववियु अध्यक्षका लागि स्वतन्त्रसहित आठ जना अध्यक्षका उम्मेदवार प्रतिस्पर्धामा छन् । अहिलेको निर्वाचनमा अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) बाट विष्णु पौडेल, नेपाल विद्यार्थी सङ्घ (नेविसङ्घ) बाट सुशील न्यौपाने, अनेरास्ववियु (क्रान्तिकारी) बाट नवीन अधिकारी उम्मेदवार हुनुहुन्छ । अनेरास्ववियु, अखिल समाजवादी र अखिल क्रान्तिकारीको संयुक्त प्यानलबाट सन्तोष पौडेल, प्राज्ञिक विद्यार्थी परिषद्बाट दिप्सन गुरुङ र अखिल (छैटौँ) बाट मिलन सुनार अध्यक्षका उम्मेदवार हुनुहुन्छ । कमल सुवेदी र विप्लपी न्यौपानेले स्वतन्त्र उम्मेदवारी दिनुभएको छ ।
