नेत्र शाही
जुम्ला, चैत ७ गते। जुम्ला बहुमुखी क्याम्पसको स्ववियु सभापतिमा नेकपा (एमाले) को विद्यार्थी संगठन अनेरास्ववियुका लोकेन्द्र बुढा विजयी हुनुभएको छ। निर्वाचन समितिका अनुसार अनेरास्ववियुका बुढाले ११४ मत प्राप्त गरेर विजयी हुनु भएको छ। उहाँका निकटतम प्रतिद्वन्द्वी अखिल क्रान्तिकारीका जयकृष्ण जैशीले १०५ मत र नेविसंघका खेमराज आचार्यले ८८ मत प्राप्त गर्नुभएको छ।
निर्वाचन अधिकृत पदमबहादुर शाहीका अनुसार जम्मा खसेकोे ३१८ मत मध्य निर्वाचनमा छात्रा १५२ र छात्र १६६ जनाले मतदान गर्नुभएको छ। सचिवमा नेविसंघका दत्तराज रावतले ९४ मत ल्याएर विजयी भएका छन्। कोषाध्यक्षमा अनेरास्ववियुकै विनबहादुर रावतले १०७ मतसहित विजयी हुनुभएको छ। कोषाध्यक्षमा अखिल क्रान्तिकारीका आशिष बुढाले ९५ मत पाउनु भएको छ। सदस्यमा नेविसंघका प्रविन बुढ्थापा १४६, राष्टु थापाले १०३ ल्याएर विजयी भएका हुनुभएको हो। अनेरास्ववियुका सुर्जा रावलले ११९, हिमाली धितालले ९७ र अखिल क्रान्तिकारीका टोपबहादुर बोहोराले १०३ मत ल्याएर सदस्य पदमा विजयी भएका छन्।
यसैगरी जुम्लाको सिञ्जा बहुमुखी क्याम्पस सिंजामा सर्वसम्मत नेतृत्व चयन भएको छ। जुम्लाको सिजा क्षेत्रमा अवस्थित सिंजा बहुमुखी क्याम्पसको स्ववियु सभापतिमा अखिल क्रान्तिकारीका सन्तोष आचार्यको नेतृत्वमा सर्वसम्मत नेतृत्व चयन गरिएको छ।
क्याम्पस प्रमुख नेपालका अनुसार अखिल क्रान्तिकारीका आचार्य सभापति, उपसभापतिमा अनेरास्ववियुका महेन्द्रराज बम, सचिवमा नेविसंघकी राजिन्दा शाही र कोषाध्यक्षमा अखिल समाजवादीका तुलाराज तिरुवा निर्विरोध चुनिएका छन्।
सदस्यमा नेविसंघका राजन बम, अखिल समाजवादीका मोहन भण्डारी र सोबिन्द बम निर्वाचित भएका छन्। २०६७ सालमा स्थापना भएको क्याम्पस सिंजा क्षेत्रको एकमात्र क्याम्पस हो।
