एसियन कपमा ध्यान दिँदै साफ जिताउने प्रयास गर्छु : प्रशिक्षक रोस

काठमाडौँ, फागुन १९ गते । नेपाली राष्ट्रिय फुटबल टोलीका नवनियुक्त प्रशिक्षक म्याट रोसले आफ्नो लक्ष्य आसन्न एसिएन कप छनोटमा उत्कृष्ट प्रदर्शन गर्दै नेपाललाई साफ च्याम्पियनसिप उपाधि दिलाउनु रहेको बताउनुभएको छ ।

अखिल नेपाल फुटबल सङ्घ (एन्फा) ले आइतबार अस्ट्रेलियाका रोसलाई मुख्य प्रशिक्षकमा नियुक्त गरेको थियो । सोमबार सञ्चारकर्मीसँग कुरा गर्दै रोसले चार सातादेखि आफुले नेपाली फुटबललाई नियाली रहेकोले नेपालमा क्षमतावान खेलाडी भएको पनि बताउनुभयो ।

‘‘नेपालका सिनियर खेलाडीले देश छाडेको कुरा राम्रोसँग थाहा छ । तर विदेश गएका खेलाडीलाई नेपाल ल्याउने र यहाँका युवा खेलाडीलाई मौका दिएर अगाडि बढ्नेछौँ । अबको पहिलो लक्ष्य विभिन्न मैत्रीपूर्ण खेल खेल्दै एसिएन कप छनोटमा ध्यान दिनेछौँ । मेरो योजना नेपाललाई एसिएन कपमा छनोट गराउने र साफ च्याम्पियनसिप जिताउनेमा केन्द्रित हुनेछ,’’ रोसले भन्नुभयो ।

उहाँले विदेश गएका खेलाडीलाई स्वदेश फर्किएर राष्ट्रिय टोलीमा योगदान गर्ने ढोका सँधै खुला रहने पनि बताउनुभयो । पछिल्लो दुई वर्षमा नेपाली राष्ट्रि टोलीका अधिकांश सिनियर खेलाडी प्रशिक्षक रोसकै देश अस्ट्रेलिया पलायन भएका छन् । 

रोसले आफु नेपाली टोलीको प्रशिक्षक बन्न पाउनु खुसीको क्षण भएको पनि सुनाउनुभयो । ‘‘नेपाली फुटबलमा दर्शकको क्रेज बेजोडको पाएँ । यहाँको आतिथ्यताले झनै लोभ्यायो । म आफ्नो कार्यकालमा नेपाललाई माथिल्लो सफलता दिलाउने प्रयास गर्नेछु । जसबाट नेपाली समर्थक खुसी बनुन्,’’ रोसले भन्नुभयो ।

नेपाली खेलाडीको क्षमता राम्रो देखेको भन्दै रोसले बल नियन्त्रण र दबाबपूर्ण खेलमा धैर्य गरेर खेल्न जरुरी रहेको पनि बताउनुभयो । एन्फाले रोससँग एक वर्षका लागि सम्झौता गरेको हो । रोसले पाउने तलब र सुविधाको विषय भने एन्फाले खुलाउन चाहेन । 

नेपाली टोलीका पूर्व प्रशिक्षक भिन्सेन्जो अल्बर्टो एनेसको कार्यकाल आठ महिनाअघि सकिएपछि नेपाली पुरुष टोली प्रशिक्षकविहीन थियो । एन्फाले प्रशिक्षकका लागि आवेदन दिएका विश्वभरका चार सय १६ प्रशिक्षकबाट २० जना हुँदै अन्तिममा पाँच जनाबाट रोसलाई नियुक्त गरेको हो ।

‘युइएफए प्रो लाइसेन्स’ मान्यताप्राप्त रोस यसअघि सन् २०२० देखि २०२३ सम्म दक्षिण कोरिया राष्ट्रिय महिला टोलीको प्रशिक्षकको जिम्मेवारीमा हुनुहुन्थ्यो ।