खलङ्गा समाचारदाता
जाजरकोट, फागुन १९ गते । गाउँबस्तीमा सुविधा पुगेपछि सहरका रूपमा विकास हुँदा उर्वर भूमि मासिन थालेका छन् । गाउँबस्ती सडक सञ्जालसँग जोडिएपछि खेतीयोग्य जमिनमा धमाधम घर बनाउने क्रम बढेको छ । जिल्लाका सात वटै स्थानीय तहमा सडक विस्तार भएपछि खेतीयोग्य जमिन धमाधम मासिन थालेका हुन् ।
भेरी कोरिडोर अन्तर्गत भेरी नगरपालिका, नलगाड नगरपालिका अन्तर्गत सडक छेउछाउका जमिनमा सर्वसाधारणले घर बनाउँदा खेतीयोग्य जमिन घडेरीमा परिणत भएका छन् । गाउँबस्ती सडक सञ्जालसँग जोडिएपछि श्रम रोजगारी र कृषि पेसाबाट आत्मनिर्भर जनतालाई आयातित खाद्य वस्तुमा निर्भर हुनुपर्ने अवस्था आएको छ ।
ग्रामीण बस्तीमा मोटर पुगेपछि सेवासुविधा पाउने आशामा पाखोबारी छोडेर खेतीयोग्य जमिन मास्ने क्रम बढ्दै गएको छ । खेतीयोग्य जमिन सहरमा परिणत हुनथालेपछि पछिल्लो समय उर्वर भूमिमा धमाधम घर ठड्याउने क्रम बढ्दै गएपछि मासिन थालेको भेरी नगरपालिका–१३ का ध्रुवप्रसाद शर्माले बताउनुभयो । गहुँ, मुसुरो, चना, तोरी, धान, मकै तथा तरकारी प्रशस्त उत्पादन हुने फाँटमा यत्रतत्र घर बनेका छन् । केही वर्षअघि खनजोत गरी अन्नबाली लगाउने बारीमा घर ठडिँदै गएपछि धनियाँ, लसुन रोप्ने ठाउँसमेत नरहने सम्भावना उहाँले बताउनुभयो ।
जनतालाई खेतबारीमा मल, बिउ लिन सजिलो बनाउन खनिएका सडक छेउछाउका जमिनमा धमाधम घर बन्न थालेपछि बुढापाका चिन्तित भएका छन् । स्थानीय तहले खेतीयोग्य जमिनमा घर बनाउन नदिने नीति ल्याउनुपर्ने उनीहरूको भनाइ छ । भौगोलिक विकटताका कारण उत्पादन निकै कम हुने गाउँबस्तीमा सडक पुगेपछि अन्नबाली लगाउने जमिनको छेउछाउमै मोटर गुडिरहेका छन् । पाखोबारीमा घर बनाएर कृषि पेसा गरी जीविकोपार्जन गर्दैआएका जनता सुविधाका लागि सडकमा झर्न थालेपछि उर्वर जमिन मासिन थालेको हो ।
भेरी नगरपालिका–११ का नारायणप्रसाद शर्माका अनुसार पछिल्लो समय उत्पादन हुने जमिनलाई घडेरीका रूपमा लिने र कृषि पेसाप्रति बेवास्था गर्दै गएपछि समस्या बढ्न थालेको छ । सरकारले नीति निर्माण गरेर खेतीयोग्य जमिन घडेरीमा प्रयोग गर्न नपाउने व्यवस्था लागु गर्न उहाँले माग गर्नुभयो ।
