नवलपरासी (बर्दघाट सुस्ता पश्चिम), फागुन १३ गते । प्रेम विवाहको विषयमा पश्चिम नवलपरासीको पाल्हीनन्दन गाउँपालिका–३ बेलासपुरमा आज दुई पक्षबिच झडप हुँदा १९ जना घाइते भएका छन् ।
इलाका प्रहरी कार्यालय महेशपुरको बा.१झ. ७४४८ नंको गाडीमा आगजनी भएको छ । नेपाल प्रहरीका ११, सशस्त्र प्रहरीका चार र स्थानीय चार जना घाइते भएको प्रहरीले जनाएको छ । झडपमा घाइते भएका पाल्हीनन्दन गाउँपालिका–३ कुश्माका ३५ वर्षीय विजय धवलको अवस्था गम्भीर रहेको जिल्ला प्रहरी कार्यालयका प्रहरी निरीक्षक नारायण थापाले बताउनुभयो ।
धवलको भैरहवास्थित सिटी अस्पतालमा उपचार भइरहेको छ । केटी पक्षका सोवराती पवरियाले चलाएको लु.१त. ७७०० नंको पिकअपले ठक्कर दिँदा धवल गम्भीर घाइते हुनुभएको हो । धवलको पेटमा चोट लागेको छ । धवलसँगै सोही स्थान बस्ने ४५ वर्षीय बैजनाथप्रसाद लोनियलाई पनि गाडीले ठक्कर दिएको हो । लोनियको दुवै खुट्टामा चोट लागेको छ ।
प्रहरीले घटनालाई नियन्त्रणमा लिन पाँच राउन्ड अश्रु ग्यास र तीन राउन्ड हवाई फायर गरेको प्रहरी निरीक्षक थापाले जानकारी दिनुभयो । केटाकेटीको प्रेम सम्बन्धलाई लिएर सुरु भएको विवादले झडपको रूप लिएको थियो । केही दिनअगाडि एक स्थानीय केटा र केटीबिच भागी विवाह भएको थियो । पछि दुवै जनालाई प्रहरीले छलफलपश्चात् अभिभावकको जिम्मा लगाएको थियो । तर केही दिनपछि उनीहरू फेरि भागेपछि दुई परिवारका बिचमा मनमुटाव सुरु भएको हो ।
सोमबार केटीपक्षले केटाका दाइलाई कुटपिट गरेका थिए । सोही विषयमा आज झडप भएको हो । केटापक्षका सयौँ मान्छेहरू मोहरम पवरियाको घर घेर्न आउँदा ढुङ्गा हानाहान भएको थियो । पवरियाको कवाडी सङ्कलन स्थलमा पनि आगजनी भएको छ ।
केटी पक्षका सोवराती पवरियाले केटा पक्षका मान्छेलाई गाडीले ठक्कर दिएपछि झडपले उग्ररूप लिएको प्रहरीले जनाएको छ ।
ठक्कर दिने चालक पवरिया र गाडी दुवैलाई प्रहरीले नियन्त्रणमा लिएको छ । घटनाको सम्बन्धमा सोधपुछका लागि प्रहरीले चार महिलालाई नियन्त्रणमा लिएको जनाएको छ । रासस
