बोमलाल गिरी
नवलपुर, फागुन १२ गते । नगरपालिकाले झुक्याएको भन्दै नवलपुरको डण्डामा रहेको अङ्कुर सामुदायिक वनले फोहोर फाल्न नदिएपछि सदरमुकाम कावासोती दुर्गन्धित बनेको छ ।
नगरपालिकाले कुनै पनि दुर्गन्ध नआउने गरी फोहोर व्यवस्थापन गर्नुपर्ने, फोहोरलाई वर्गीकरण गरी कुहिनेलाई कम्पोष्ट मल बनाउने, नकुहिनेलाई पुनः प्रयोग गर्नेलगायतका सहमति पालना नगरेको भन्दै वनले फोहोर फाल्न नदिएको हो ।
यस्तै पालिकाले बजेट विनियोजन गर्दा अन्य वनलाई जस्तै अङ्कुरलाई पनि बजेट विनियोजनमा प्राथमिकता दिनुपर्ने, बिग्रेका मेसिनहरु मर्मत गर्नुपर्ने, फोहोर आजको आजै वर्गीकरण गर्नुपर्ने र वर्गीकरणपछि मात्र फोहोर उठाउने माग राखेको छ । जसका कारण कावासोतीमा १० दिनदेखि फोहोर उठ्न सकेको छैन ।
नगरपालिकाले सहमतिविपरीत फोहोर उठाएकाले विसर्जन गर्न नदिएको वनका अध्यक्ष लोकबहादुर केसीले बताउनुभयो । नगरपालिकासँग आइतबार भएको छलफल सहमति नजिक पुगेको भए पनि अहिलेसम्म सङ्कलन भएको फोहोरलाई पहिले वर्गीकरण गरेर मात्र फोहोर उठाएर विसर्जन गर्न दिने अध्यक्ष केसीले बताउनुभयो ।
कावासोती नगरपालिकाका प्रमुख विष्णुप्रसाद भुसालले सामुदायिक वनले फोहोर व्यवस्थापनका लागि केही सर्त राखेर नगरपालिकामा पत्र बुझाएको र सोही विषयमा कार्यपालिकामा छलफल गरेर निर्णय गरिने बताउनुभयो । वनसँग भएको छलफल सहमति नजिक पुगेको भुसालकोे भनाइ छ ।
नगरपालिकाका प्रमुख प्रशासकीय अधिकृत लीलाराज पौडेलले अङ्कुर सामुदायिक वनका पदाधिकारीसँग भएको छलफलमा ११ बुँदे सहमतिको ड्राफ्ट भएको र नगरपालिकाले प्राथमिकताका आधारमा सहमति कार्यान्वयन गर्दै जाने तर फाेहोर भने उठाइहाल्नुपर्ने बताउनुभयो ।
नगरपालिकाले अङ्कुर सामुदायिक वनको नजिकै रहेको केरुङ्गे खोला छेउमा विगत ५ बर्षदेखि फोहोर फाल्दै आएको छ । नगरपालिकाले फोहोर उठाउनका लागि बर्षेनी टेण्डर आह्वान गरेर ठेक्कामा फोहोर उठाउन दिने गरेको छ । जस वापत नगरपालिकाले फोहोर सङ्कलन गर्दा घरघरबाट उठेको रकमको २४ प्रतिशत रकम लिने गरी ठेक्का लगाएको हो ।
