राजन रावत
हुम्ला, फागुन ८ गते । नेकपा एमालेको देशभर सञ्चालन भई रहेको जरा अभियान हुम्ला जिल्लाका २० वटा वडामा सञ्चालन भएको छ । गत माघ १४ गतेबाट सुरु भएको उक्त अभियान फागुन ९ गतेसम्म आइपुग्दा ती वडामा सञ्चालन भएको हो ।
जिल्ला सातमध्ये छ वटा वडामा २० वटा वडामा जरा अभियान सञ्चालन भइसकेको एमाले हुम्लाका सचिव तीर्थराज बोहराले बताउनुभयो । हाल जरा अभियान सञ्चालन भएका गाउँपालिकाहरूमा सिमकोट, खार्पुनाथ, सर्केगार्ड, चङ्खेली, अदानचुली र ताँजाकोट रहेका छन् । यी गाउँपालिका ३८ वटा वडा रहेका छन् । अझै १८ वटा वडामा सो अभियान गर्न बाँकी नै रहेको छ ।
उहाँले प्रत्येक दिन जसो वडाहरूमा अभियान सञ्चालन भई रहेको बताउनुभयो । अभियानका क्रममा वडा कमिटी, अगुवा कार्यकर्ता, सङ्गठित सदस्यहरूको उपस्थितीमा खटिएका जिल्ला स्तरका नेताहरूले प्रशिक्षण दिने गरिएको उहाँले बताउनुभयो ।
त्यसैगरी जरा अभियानमा वडा कमिटीलाई सशक्त बनाउने, नियमित बैठक बस्ने, सङ्गठित सदस्यता नवीकरण गर्ने, नियमित शुल्क उठाउने , स्थानीय तहहरूले गर्ने कामको लेखाजोखा गर्ने, लगायतका विषयमा छलफल हुने गरेको उहाँले बताउनुभयो । उत्तरी नाम्खा गाउँ पालिकामा भने यो अभियान सुरु हुन सकेको छैन । केही समयमा सुरु गर्ने एमाले हुम्लाले जनाएको छ । यो अभियान फागुन २४ गतेसम्म सञ्चालन हुनेछ ।
