राजन रावत
हुम्ला, फागुन १ गते । किसानहरु स्याउ बगैँचाका बोटहरूमा बोलोपेस्ट गर्ने कार्यका ब्यस्थ्य देखिनु भएको छ । स्याउको बोटलाई किराबाट सुरक्षित गर्न र उत्पादन वृद्धि गर्नका लागि जिल्ला भरका किसानहरू यो कार्यमा लाग्नु भएको हो ।
खार्पुनाथ गाउँपालिका– ५ का किसान नवराज शाहीले आफ्नो डेढ सय बोट भएको स्याउ बगैँचाका बिरुवाहरूलाई बोलोपेष्ट रसायन लगाउने कार्य गरिएको बताउनुभयो । उहाँले बगैँचामा भएका सबै स्याउका बोटलाई गाउँपालिकाको कृषि शाखाका सहयोगमा बोलोपेष्ट लगाउने कार्य भएको बताउनुभयो । यता सिमिकोट गाउँपालिका– ४ का अगुवा किसान जङ्ग बहादुर शाहीले पनि तीन सय स्याउका बोटमा बोलोपेष्ट लगाउने कार्य भएको बताउनुभयो ।
स्याउ बगैँचाको व्यवस्थापन सम्बन्धी तालिम लिएपछि उहाँले आफै बोलोपेष्ट खरिद गरेर बिरुवामा लगाउने कार्य भएको बताउनुभयो । उहाँले स्याउका बिरुवामा पहिलो पटक यो रसायन लगाउनु भएको हो । सिमिकोट गाउँपालिका कृषि शाखाका प्रमुख नेत्रबहादुर शाहीले स्याउका बिरुवामा लाग्ने भुवादारी किराबाट जोगाउनका बोलोपेष्ट लगाउने कार्य हुने गरेको बताउनुभयो । स्याउका बिरुवामा बोलोपेष्ट डाँट र काँटछाँट गर्न हाँगामा हुने घाउमा पनि लगाउने गरिएको उहाँले बताउनुभयो ।
बिरुवामा बोलोपेष्ट बिशेषगरि रोग किराबाट बचाएर उत्पादनमा वृद्धि गर्नका लागि लगाउने पर्ने रसायन रहेको उहाँले बताउनुभयो । स्याउको बोटबाट गुणस्तरीय स्याउ उत्पादन गर्न र बिरुवालाई रोगबाट बचाउनका लागि वर्षेनी बोलोपेष्ट लगाउनु उपयुक्त हुने बताउँदै यसका लागि किसानले पनि विशेष ध्यान दिन आवश्यक रहेको बताउनुभयो ।
जिल्लामा सो रसायन लगाउने कार्यमा गाउँपालिका कृषि शाखा, कृषि विकास कार्यालय र स्याउ जोन परियोजनाले सहयोग गर्दै आएका छन् भने किसानहरूले आफै पनि लगाउन थालेका छन् । यसका लागि यस वर्ष यी सेवा प्रदायक निकासहरूले पच्चीस हजार स्याउका बोटमा बोलोपेष्ट लगाउने कार्य गत पुस महिनाबाटै गर्दै आउनु भएको छ ।
