‘गुणस्तरीय सेवा प्रवाह र सुशासनमा उल्लेख्य प्रगतिका लागि अध्यादेश’

काठमाडौं, माघ १० गते । उपप्रधान एवम् अर्थमन्त्री विष्णुप्रसाद पौडेलले गुणस्तरीय सेवा प्रवाह र सुशासनमा उल्लेख्य प्रगति गर्नका लागि अध्यादेश ल्याइएको बताउनुभएको छ । बिहीबार काठमाडौंमा राष्ट्रिय वाणिज्य बैंकको ६० औं वार्षिकोत्सवको अवसरमा आयोजित कार्यक्रमलाई सम्बोधन गर्नुहुँदै उहाँले यस्तो बतउनुभएको हो ।

अर्थमन्त्री पौडेलले समयको अभाव र काम गर्नैपर्ने दबाबका कारण अध्यादेश ल्याइएको जानकारी दिनुभयो । उहाँले मुलुकको अर्थतन्त्र केही समय अघिदेखि दबाब र चापमा रहँदै आएको उल्लेख गर्नुहुँदै अर्थतन्त्रका समस्याहरुलाई चिन्दै, चिर्दै र समाधान गर्दै अघि बढ्ने कोशिस गरिरहेको बताउनुभयो ।

उहाँले समग्र अर्थतन्त्रलाई गतिशील, चलायमान बनाउने र उत्पादन, उत्पादकत्व वृद्धि गर्ने, रोजगारी सिर्जना गर्ने र सबल राष्ट्रिय अर्थतन्त्रको निर्माण गर्ने अभियानमा तीव्रताका साथ सरकार लागिरहेको बताउनुभयो । उहाँले अहिलेको सरकारले कुनै औषत काम गरेर एउटा सरकारको सूचीमा अर्को एउटा सरकार भएर दिन बिताउने पक्षमा नरहेको औंल्याउनुभयो ।

उहाँले भन्नुभयो, ‘‘अहिलेको सरकारले कुनै औसत काम गरेर एउटा सरकारको सूचिमा अर्को एउटा सरकार भएर दिन बिताउने पक्षमा यो सरकार छैन । हामीसँग सङ्ग्रहित समस्याको निकै लामो चाङ छ । यी समस्याहरु हामी एकएक गरेर पन्छाउँदै जान चाहन्छौँ । साँचै नै छोटो अवधिमा दूरगामी महत्त्वका उपलब्धिहरु आर्जन गर्न चाहन्छौँ । विशेष गरी अर्थतन्त्रका क्षेत्रमा जस्ता समस्याहरु छन्, ती समस्याहरु प्रभावकारी ढङ्गले सम्बोधन गर्न र समाधान गर्न चाहन्छौँ ।’’

अर्थमन्त्री पौडेलले अर्थतन्त्रका क्षेत्रमा रहेका समस्याहरुको प्रभावकारी समाधान गर्ने पक्षमा सरकार रहेको बताउनुभयो । आन्तरिक र बाह्य लगानी लगानी अभिवृद्धि गर्ने, उत्पादन, उत्पादकत्व वृद्धि गर्न अध्यादेश ल्याइएको बताउनुभयो ।

‘‘हामीले २९ वटा ऐन अध्यादेशका माध्यमबाट संशोधन गरेका छाैं । ती अध्यादेशहरु सदन सुरु भएको पहिलो दिन नै सदनसमक्ष प्रस्तुत हुँदैछन् । ६० दिनभित्र अध्यादेशहरु अनुमोदित हुनेछन् । हामीसँग समय हुन्थ्यो भने योभन्दा फरक तरिकाले जान्थ्यौँ होला ।,’’ अर्थमन्त्री पौडेलले भन्नुभयो, ‘‘तर हामीसँग समयको चाप छ, त्यसलाई ख्याल गरेर, नागरिकहरुको निराशालाई आशामा बदल्नका लागि देशभित्र भविष्य छ भनेर भविष्य खोज्ने त्यस खालको अनुकूल परिस्थिति निर्माण गर्न ऐनहरुमा संशोधन गर्ने अध्यादेश अघि सारेको छ । खासगरी अध्यादेशबाट गुणस्तरीय सेवा प्रवाह र सुशासनमा उल्लेख्य प्रगति गर्न चाहेका छौँ । आन्तरिक र बाह्य लगानी लगानी अभिवृद्धि गर्ने, उत्पादन, उत्पादकत्व वृद्धि गर्न अध्यादेश ल्याएका छौँ ।’’

उपप्रधानमन्त्री पौडेलले वर्तमान सरकारले गुणस्तरीय सेवा प्रवाह र सुशासनमा काम गर्न चाहेको बताउनुभयो ।

‘‘समग्र अर्थतन्त्रलाई गतिशील र चलायमान बनाउने, उत्पादन, उत्पादकत्व वृद्धि गर्ने, रोजगारी सिर्जना गर्ने र सबल राष्ट्रिय अर्थतन्त्रको कारी पहलकदमी निर्माण गर्ने यस अभियानमा हामी तीव्र गतिमा अघि बढ्न चाहन्छौँ ।,’’ उहाँले भन्नुभयो, ‘‘त्यस दिशामा प्रभाव लिन चाहन्छौँ । तरलता विस्तार भइरहेको अवस्था छ । यो तरलतालाई उत्पादन, उत्पादकत्व वृद्धि गर्ने, रोजगारी सिर्जना यसका निमित्त कसरी सदुपयोग गर्ने यसतर्फ सोच्नुस् ।’’