गोरखापत्र समाचारदाता
काठमाडौँ, माघ ४ गते । जुनिम गहतराजको निर्देशन रहेको चलचित्र ‘ताण्डवम्’ को पोस्टर सार्वजनिकसहित प्रदर्शन मिति घोषणा गरिएको छ । पोस्टर सार्वजनिक गर्दै चलचित्र फागुन ९ गतेबाट प्रदर्शनमा आउने निर्माण पक्षले जनाएको छ । पोस्टरमा चलचित्रका प्रमुख कलाकारलाई देखाइएको छ । पोस्टरमा पुष्कर गुरुङ, प्रेम सुब्बा, सरिना मगर, अङ्कित खड्का, अनोज पाण्डे र जुनिम गहतराज देखिनुभएको छ ।
नवविवाहित जोडीले पहिलो सन्तानको स्वागतको तयारी गरिरहँदा उनीहरूको जीवनमा घट्ने अकल्पनीय घटनाले निम्त्याउने उतारचढावको कथालाई पारिवारिक तथा द्वन्द्वथ्रिलरमा प्रस्तुत गरिएको छ ।
सिंहदेवी प्रोडक्सनको ब्यानरमा निर्माण भएको चलचित्रका निर्माता धनकुमारी गहतराज, सविना मगर र मनिष गौतम हुनुहुन्छ । हरि घले लामाले खिच्नुभएको चलचित्रमा सम्राट् बस्नेतको द्वन्द्व निर्देशन र सुशान्त गौतमको सङ्गीत रहेको छ । चलचित्रको कथा, पटकथा तथा संवाद अनिरुद्ध आत्रेय र हुसेनले लेख्नुभएको हो ।
