काठमाडौँ, माघ १ गते । बीबीसी भेट्रानले दोस्रो ललितपुर मेयर कप भेट्रान फुटबल प्रतियोगिताको उपाधि जितेको छ ।
जावलाखेल मैदानमा मङ्गलबार भएको फाइनलमा बीबीसीले आयोजक कुसुन्ती ‘बी’ लाई २–० गोलले हरायो । बीबीसीका लागि दीपक लामाले पहिलो तथा आकाश छन्त्यालले दोस्रो गोल गर्नुभयो ।
उपाधिसँगै बीबीसीले दुई लाख रुपियाँ पुरस्कार पायो । उपविजेता कुसुन्ती ‘बी’ ले एक लाख रुपियाँ पायो । कुसुन्ती ‘बी’ का सविनबाग श्रेष्ठ उत्कृष्ट खेलाडी, कुसुन्ती ‘बी’ कै प्रदीप तण्डुकार उत्कृष्ट गोलरक्षक र बीबीसीका दीपक लामा उत्कृष्ट डिफेन्डर घोषित हुनुभयो । उत्कृष्टलाई जनही पाँच हजार रुपियाँ प्रदान गरियो ।
विजेतालाई ललितपुर महानगरपालिकाका प्रमुख चिरीबाबु महर्जनलगायतले पुरस्कार प्रदान गर्नुभयो । पुस २२ गतेदेखि सुरु प्रतियोगितामा ३० टिमले नकआउट आधारमा प्रतिस्पर्धा गरेका थिए ।
