काठमाडौँ, पुस १९ गते । लोकसेवा आयोगले राज्य संरचनामा भएको परिवर्तनका सन्दर्भमा नेपालको निजामती सेवामा थप सुधार र पुनर्संरचना आवश्यक देखिएको सुझाव दिएको छ ।
प्रतिनिधिसभा अन्तर्गतको राज्य व्यवस्था तथा सुशासन समितिमा विचाराधीन सङ्घीय निजामती सेवाको गठन, सञ्चालन र सेवाका शर्त सम्बन्धमा व्यवस्था गर्न बनेको विधेयकमा शुक्रबार उहाँले सो सुझाव दिनुभएको हो ।
आयोगका अध्यक्ष माधवप्रसाद रेग्मीले निजामती कर्मचारीले चुनौतीपूर्ण कार्य गर्न अग्रसर नभएको देखिएको बताउनुभयो ।
अध्यक्ष रेग्मीले भन्नुभयो, “यहाँ कस्तो प्रवृत्ति भइदियो सरकारी सेवामा प्रवेश हुनासाथ शाखा अधिकृतको तयारीमा लाग्ने, उपसचिव हुनासाथ सहसचिवको तयारीमा लाग्ने र त्यहीतिर मात्रै उहाँहरुको कामकारवाही भइसकेपछि जोखिम लिने लगायतका विषय र काम उहाँहरुबाट भएन ।”
उहाँले अनुभव र परिपक्वताको कमीले गर्दा यस्तो भइरहेको धारणा राख्नुभयो ।
