गोरखापत्र समाचारदाता
काठमाडौँ, पुस १६ गते । ग्लोबल आइएमई बैङ्क लिमिटेडको १८ औँ वार्षिकोत्सवका अवसरमा सोमबार देशव्यापी प्रभातफेरी कार्यक्रमको आयोजना भएको छ । आमजनमानसमा वित्तीय साक्षरता तथा बैङ्किङ सचेतना अभिवृद्धिका संस्थागत सामाजिक उत्तरदायित्व अन्तर्गत उक्त बैङ्कले सात वटै प्रदेशका मुख्य सहरमा प्रभातफेरी आयोजना गरिएको जनाइएको छ । पुस १८ गतेदेखि ग्लोबल आइएमई बैङ्क स्थापनाको १८ औँ वर्ष पूरा भई १९ औँ वर्षमा प्रवेश गर्दै छ । काठमाडौँमा आयोजित प्रभातफेरीमा नेपाल उद्योग वाणिज्य महासङ्घका अध्यक्ष तथा ग्लोबल आइएमई बैङ्कका अध्यक्ष चन्द्रप्रसाद ढकाल, सञ्चालक समिति सदस्य, उच्च व्यवस्थापनसहित कर्मचारीको उपस्थिति थियो ।
