गोरखापत्र समाचारदाता
काठमाडौँ, पुस १४ गते । चलचित्र ‘कार्साङ’ को गीत सार्वजनिक भएको छ । चलचित्रको प्रदर्शन मिति नजिकिँदै गर्दा निर्माण पक्षले शनिबार ‘सात भन्ज्याङ’ बोलको गीत सार्वजनिक गरेको हो । गीतमा डिपी खनालको शब्द रचना र एसडी योगीको सङ्गीत रहेको छ । योगी र रेश्मा पुनमगरले स्वर दिनुभएको गीतको रिकेश गुरुङले सङ्गीत संयोजन गर्नुभएको हो ।
गीतको भिडियोमा चलचित्रका मुख्य कलाकारद्वय दयाहाङ राई र सिर्जना निङलेखुको अभिनय देख्न सकिन्छ । प्रेमिल गीतमा दयाहाङ र सिर्जनाको प्रेम देखाइएको छ । प्रेम, त्यसका सम्झना, सँगै जिउने रहर र त्यसका लागि दुई पात्रको योजनामा गीत केन्द्रित छ । मौलिक शब्द र वेशभूषाले गीतलाई जीवन्त बनाएको छ । पूर्वी नेपालको शेर्पा समुदाय र राई समुदायको कल्चर गीतमा प्रस्ट देखिन्छ । जसले गीतलाई राम्रो बनाउन सहयोग गरेको छ । बिटा लगाउँदै दाइँ गरेको दृश्यले ग्रामीण परिवेश चित्रण गरेको छ । पुस २६ गते प्रदर्शनको तयारीमा रहेको चलचित्रमा यम शेर्पाको डेब्यु निर्देशन रहेको छ । चलचित्रमा दयाहाङ र सिर्जनासँगै जितु नेपाल, दिया मास्के, बुद्धि तामाङ, सृष्टि गौतम, डोमा ह्योल्मो, प्रेम लोप्चन र सुरवीर पण्डितलगायतका कलाकारको अभिनय रहेको छ । सिर्जना निङलेखुको यो डेब्यु चलचित्र हो । यार्सा फिल्म्स र पुरुषोत्तम प्रधान फिल्म्सको प्रस्तुतिमा बनेको चलचित्रका निर्माता तथा छायाकार पुरुषोत्तम प्रधान हुनुहुन्छ भने सहनिर्मातामा गोविन्द बोहोरा रहनुभएको छ ।
