गोरखापत्र समाचारदाता
काठमाडौँ, पुस १४ गते । चलचित्र ‘नरसिंहाः अवतार’ नयाँ वर्षको अवसर पारेर चैत २९ गते प्रदर्शनमा आउने भएको छ । दिवाकर भट्टराईको निर्देशनमा निर्माण भइरहेको चलचित्रबाट राजेश हमाल आठ वर्षपछि चलचित्रमा देखिन लाग्नुभएको हो । द्वन्द्व र सामाजिक विषयवस्तुमा निर्माण भएको चलचित्रमा हमालसँगै राज कटुवाल, नीति शाह, सनिशा भट्टराई, अर्जुन श्रेष्ठ, सरोज खनाल, दीपा शाही, प्रशान्त ताम्राकार, नीर शाह, रमेशचन्द सोडारी, प्रकाश कुँवरलगायत कलाकारको अभिनय रहने छ । चलचित्रमा नेम महर्जन, दीपक शर्मा ढकाल, कुँवर न्यौपाने र नरेन्द्र महर्जनको लगानी रहेको छ । चलचित्रलाई एप्पल इन्टरटेन्मेन्ट, रिच इन्टरटेन्मेन्ट र एफडी कम्पनीले देशभरका हलमा वितरण गर्दै छन् ।
