बाबुराम कार्की
वराहक्षेत्र, पुस १० गते । वराहक्षेत्र नगरपालिका-१० प्रकाशपुरस्थित सप्तरी टोलमा मङ्गलबार राति विद्युतीय तार सर्ट भई आगलागी हुँदा १० लाख बराबरको क्षति भएको छ ।
स्थानीय नवराज पौडेलको तल पक्कीवाल माथि काठको टाँटी बेरा र टिनको छानो भएको टारे घर जल्दा १० लाख बराबरको क्षति भएको जिल्ला प्रहरीले कार्यालय सुनसरीले जनाएको छ ।
आगलागीबाट नवराज पौडेलको एउटा ग्वाली, घर, छ ओटा खसी, तीन ओटा बाख्रा, पाँच वटा पाठा, ५० मन धान, २० मन मकै जलेर नष्ट भएको छ । आगलागीमा कोशी कम्पनीको ग्यास सिलिन्डर दुई वटा र ४० हजार नगद सहित तीन बिघाहाको पराल, लत्ता कपडा, भाडावर्तन पूर्ण रूपमा जलेर नष्ट हुँदा १० लाख बराबरको क्षति भएको जिल्ला प्रहरी कार्यालय सुनसरीका प्रहरी नायब उपरीक्षक रामप्रसाद तिमल्सिनाले जानकारी दिनुभयो ।
आगो नियन्त्रमा लिन स्थानीयवासी, प्रकाशपुर प्रहरी चौकीका प्रहरी नायव निरीक्षक भोलानाथ धमला र इलाका प्रहरी कार्यालय महेन्द्रनगरका प्रहरी निरीक्षक विकास राई सहितको प्रहरीको टोली खटिएको थियो । आगोलागीबाट छिमेकी प्रकाश कार्कीको १५ कठ्ठाको पराल र काठ जल्दा ३० हजार बराबरको क्षति भएको प्रहरीले जनाएको छ ।
आगोलाई नियन्त्रणमा लिन वराहक्षेत्र नगरपालिका, कोशी गाउँपालिका र झुम्का नगरपालिकाको बारुद यन्त्रलाई एक घण्टा लागेको थियो ।
