रेखीराम राना
तानसेन, मङ्सिर ३० गते । नेपाल पत्रकार महासङ्घ पाल्पा शाखाको अध्यक्षमा कमलराज तिमिल्सेना निर्वाचित हुनुभएको छ । महासङ्घको अध्यक्षका लागि भएको मतदानमा तिमिल्सेनाले ५२ मतसहित विजयी हुनुभएको हो ।
उहाँको निकटतम प्रतिस्पर्धी कृष्ण दर्नालले ११ मत पाउनुभयो । ७१ जना सदस्यमध्ये ६५ मत खसेको निर्वाचन समितिका संयोजक एवं शाखाका पूर्व अध्यक्ष गोविन्दप्रसाद भट्टराईले जानकारी दिनुभयो । निर्वाचित हुनुभएका तिमिल्सेना प्रेस चौतारी र प्रेस युनियनको तर्फबाट उम्मेदवार बन्नुभएको थियो ।
यस्तै, उपाध्यक्षमा मुक्तिप्रसाद न्यौपाने र वन्दना पोखरेल निर्विरोध निर्वाचित हुनुभएको छ । सचिवमा ४९ मतसहित रामचन्द्र रायमाझी निर्वाचित हुनुभएको छ । सचिव पदका अर्का उम्मेदवार भोजराज भट्टराईले १३ मत मात्र पाउनुभयो ।
सोहीअनुसार सहसचिवमा दुर्गेश मल्ल र दानबहादुर हिस्की निर्विरोध हुनुभयो । कोषाध्यक्षमा विजयकुमार बौडेल, सदस्यमा सुनिल कार्की, दयाराज न्यौपाने, नेत्र गैरे, दीपक ढुङ्गाना, सुशीला रेग्मी, हरिबहादुर विक र धनबहादुर ठाडा निर्विरोध निर्वाचित हुनुभएको निर्वाचन समितिका संयोजक भट्टराईले जानकारी दिनुभयो ।
