अमरराज नहर्की
तनहुँ, भदौ १५ गते । भौतिक पूर्वाधार तथा यातायात मन्त्री देवेन्द्र दाहालले पृथ्वीराजमार्ग निर्माणको काम छिटो सक्न निर्देशन दिनुभएको छ ।
पृथ्वी राजमार्ग (मुग्लिन-पोखरा सडकखण्ड) विस्तारको कामको निरीक्षण गर्दै मन्त्री दाहालले काम छिटो सक्न निर्देशन दिनुभएको हो ।
सडक विस्तारको कामको शुक्रबार निरीक्षण गर्दै मन्त्री दाहालले नेपालीको ठुला चाडपर्व नजिकिएकोले यात्रुलाई यात्रा सहज बनाउने गरी काम गर्न निर्देशन दिनुभयो । अप्ठ्यारो रहेको स्थानलाई प्राथमिकता दिएर काम गर्न उहाँले आग्रह गर्नुभयो ।
मन्त्री दाहालले निरीक्षणको क्रममा उक्त सडक विस्तारका क्रममा भएका प्रगति, समस्या तथा आगामी योजनामा सरकारको तर्फबाट गर्नुपर्ने कार्य विवरणबारे पनि जानकारी लिनुभएको थियो ।
सडक विस्तारमा गुणस्तरीयतासँगै सवारी साधन आवागमनमा अवरोध नपुर्याउन ठेकेदार कम्पनीलाई निर्देशन मन्त्री दाहालले दिनुभएको थियो । सडकको दुवैतर्फ खाल्डाखुल्डी बनाएर सवारी आवागमन नै समस्या पार्ने गरी भइरहेको कामप्रति भने उहाँले असन्तुष्टि पोख्नुभयो।
