ऊ दिलो दिमागमा
हरबखत देश सोचिरहन्छ
देश बोकिरहन्छ
देशकै बारे लेख्छ कविता
देश नै उसको सिङ्गो कविता हो,
कविता नै देश हो ।
देशलाई माया गर्छ ऊ
पितामातालाई जस्तै
चिन्तन–मनन गर्छ ऊ देशकै बारे
जहाँ गए पनि देश लिएर हिँड्छ ऊ
हृदयमा बुन्छ विकासको योजना
निर्माण गर्छ देशको सिर्जना
ऊ देशको एउटा असल पात्र हो
ऊ देशको एउटा कर्मठ सिपाही हो
जहिले पनि देशसँगसँगै हिँड्छ ऊ
सुन्दर विचार बोकेर !
