राममणि दाहाल
हेटौँडा, साउन ८ गते । बागमती प्रदेशमा नयाँ सरकार गठनका लागि नेपाली कांग्रेस बागमती प्रदेश संसदीय दलका नेता बहादुर सिं लामा (तामाङ) ले दाबी पेस गर्नुभएको छ।
सङ्घमा दुई ठुला दल कांग्रेस र नेकपा एमालेले सत्ता साझेदारी गर्ने सहमति गरेसँगै बागमती प्रदेशमा कांग्रेस संसदीय दलका नेता लामाको नेतृत्वमा नयाँ सरकार गठन गर्न लामाले दाबी पेस गर्नुभएको हो ।
कांग्रेस र एमालेका नेताहरू प्रदेश प्रमुख यादवचन्द्र शर्मासमक्ष नयाँ सरकार गठनका लागि दाबी पेस गर्न प्रदेश प्रमुखको कार्यालय पुग्नुभएको थियो । कांग्रेसका ३७ र एमालेका २७ प्रदेश सभा सदस्यको समर्थनमा नयाँ सरकार गठनका लागि प्रदेश प्रमुख समक्ष दाबी पेस गरिएको छ ।
यसअघि बागमती प्रदेशका मुख्यमन्त्री शालिकराम जम्कट्टेलको राजीनामापछि प्रदेश प्रमुख शर्माले नयाँ सरकार गठनका लागि आइतबार प्रदेश सभामा प्रतिनिधित्व गर्ने दलहरूलाई आह्वान गर्नुभएको थियो ।
बागमती प्रदेशको मुख्यमन्त्री पदमा नियुक्ति गर्न प्रदेश प्रमुख समक्ष आफ्नो दाबी पेस गर्न दलहरूलाई आज मङ्गलबार बेलुका ५ः०० बजेसम्म समय दिइएको छ । लामाले सरकार गठनका लागि दाबी पेस गरेसँगै आजै साँझ ५ बजेपछि लामालाई प्रदेश प्रमुखले मुख्यमन्त्रीमा नियुक्ति गर्ने जनाइएको छ ।
