बुढीगण्डकी नदीमा पुरुषको शव फेला

गुणबहादुर रोका
सुलीकोट, जेठ २२ गते । बुढीगण्डकी नदीमा एक पुरुषको शव फेला परेको छ । फेला परेको शव आरुघाट गाउँपालिका – ९ आरुचनौटेका वर्ष ५९ का बुद्धिबहादुर परियार रहेको जिल्ला प्रहरी कार्यालय गोरखाका प्रहरी नायब उपरीक्षक रमेशकुमार श्रेष्ठले जानकारी दिनुभयो ।

उहाँका अनुसार गएको जेठ २० गते आइतबार दिउँसो १ बजे घरमा कसैलाई जानकारी नदिइकन घरबाट निस्किएका परियार घर नफर्किएपछि खोजी गर्न आफन्तले प्रहरी कार्यालयमा निवेदन दिएका थिए ।

स्थानीय र प्रहरीको सहयोगमा खोज्दै जाँदा भीमसेन थापा गाउँपालिका – ४ धावाको बालुवाटारस्थित गोरखातर्फको बुढीगण्डकीको किनारमा मङ्गलबार शव तैरिएको अवस्थामा फेलापरेको प्रहरीको भनाइ छ । त्यस घटनाबारे थप अनुसन्धान भइरहेको जिल्ला प्रहरी कार्यालय गोरखाले जनाएको छ ।