सुन्दरबजार (लमजुङ) जेठ २० गते । गण्डकी प्रदेशका मुख्यमन्त्री सुरेन्द्रराज पाण्डेले राज्यका हरेक क्रियाकलापमा पत्रकारहरूको भूमिका महत्त्वपूर्ण हुने भएकोले सरकारले सहयोग गर्दै आएको बताउनुभएको छ ।
आज नेपाल पत्रकार महासङ्घ लमजुङ शाखाको नवनिर्मित भवन उद्घाटन गर्दै मुख्यमन्त्री पाण्डेले पछिल्लो प्रदेश सरकारले पत्रकारिता क्षेत्रको विकासका लागि लोक कल्याणकारी विज्ञापनको रकम र पत्रकारका लागि निःशुल्क स्वास्थ्य बिमाको कार्यक्रम सुरु गरिएको बताउनुभयो । यसअघि आफ्नो नेतृत्वमा रहेको सरकारले पत्रकारको क्षमता अभिवृद्धिका लागि लेखनवृत्तिलगायत कार्यक्रम कार्यान्वयन गरेको पनि उहाँले बताउनुभयो ।
“देशमा हुने हरेक परिवर्तनमा पत्रकारको महत्त्वपूर्ण भूमिका छ । पछिल्लो परिवर्तनलाई संस्थागत गर्न यहाँहरूबाट सकारात्मक सहयोगको आवश्यकता छ । त्यसैले अझै निर्भीकताका साथ कलम चलाउन आग्रह गर्दछु”, मुख्यमन्त्री पाण्डेले भन्नुभयो,“सबै जिल्लामा महासङ्घको भवन बनाउनुपर्छ भन्ने महासङ्घको अभियानमा प्रदेश सरकारको साथ र समर्थन छ । त्यसबाहेक पत्रकारिताको विकासका लागि प्रदेश सरकार प्रतिबद्ध छ ।”
बेसीसहर नगरपालिका वडा नम्बर ३ मा निर्मित महासङ्घ लमजुङ शाखाको भवनका लागि गण्डकी प्रदेश सरकारले ३५ लाख सहयोग गरेको थियो । गोरखा, लमजुङ र तनहुँमा महासङ्घको भवन बनाउन प्रदेश सरकारले सहयोग गरेको थियो भने बाँकी जिल्लामा पनि सहयोग गर्ने मुख्यमन्त्री पाण्डेले प्रतिबद्धता व्यक्त गर्नुभयो । रासस
