तथ्याङ्कीय कार्यमा संलग्न निकायबिच समन्वय जरुरी : मुख्यसचिव अर्याल

काठमाडौँ, जेठ १८ गते । नेपाल सरकारका मुख्य सचिव डा. वैकुण्ठ अर्यालले तथ्याङ्कीय कार्यमा संलग्न निकाय रुकाबिच प्रभावकारी समन्वय प्रणाली विकास गर्नुपर्ने बताउनुभएको छ ।

बिहीबार राष्ट्रिय तथ्याङ्क कार्यालयले आयोजना गरेको ‘तथ्याङ्क प्रणाली विकासका लागि राष्ट्रिय रणनीति उच्चस्तरीय सुझाव सङ्कलन गोष्ठी’ मा बोल्नुहुँदै उहाँले यस्तो बताउनुभएको हो । उहाँले तथ्याङ्कीय कार्यमा सङ्घ, प्रदेश र स्थानीय सरकारका बिचमा समन्वय हुन नसकेको बताउनुभयो ।

उहाँले तथ्याङ्क निकाल्दा शुद्ध रूपमा निकाल्नुपर्ने भन्दै तथ्याङ्क प्रमाणीकरण हुनुपर्नेमा जोड दिनुभयो । उहाँले राष्ट्रिय तथ्याङ्क कार्यालयले निकालेको तथ्याङ्क र स्थानीय तहले निकालेको तथ्याङ्क आपसमा नमिलेको भन्दै यसतर्फ सम्बन्धित निकाय सचेत हुनुपर्ने बताउनुभयो ।

‘‘सङ्घीय, प्रादेशिक तथा स्थानीय तथ्याङ्क प्रणाली सुदृढीकरणका लागि आवश्यक पूर्वाधार तयार गर्ने भन्ने । हामीले के गर्‍यौँ त भन्दाखेरी त्यो तथ्याङ्क प्रणाली सुदृढ गर्नका लागि आवश्यक पूर्वाधार तयार गर्ने  त्यो एउटा पाटो त हो । तर हामीले तीन तहको जुन तथ्याङ्कहरू छन्, त्यसको शुद्धता परीक्षणको कुराहरूलाई शुद्धता र प्रमाणीकरणको कुराचाहिँ मुख्य हो कि अब ।,’’ मुख्य सचिव डा. अर्यालले भन्नुभयो, ‘‘अर्को, तथ्याङ्कीय कार्यमा संलग्न निकायहरूका बिच प्रभावकारी समन्वय प्रणाली विकास गर्ने । तथ्याङ्क प्रतिवेदन प्रकाशित भएको एक महिनापछि स्थानीय तहहरूले निकालेको प्रोफाइलमा डाटा फरक छ । यसतर्फ पनि ध्यान दिनुपर्छ ।’’

त्यस्तै, कार्यक्रममा बोल्नुहुँदै राष्ट्रिय योजना आयोगका सदस्य डा. रामकुमार फुयाँले आगामी दिनमा दिगो विकास लक्ष्यसँग सम्बन्धित तथ्याङ्क उत्पादन गर्नुपर्ने बताउनुभयो । उहाँले दशौँ वर्ष अघिको तथ्याङ्क प्रयोग गरिने गरेको भन्दै तथ्याङ्कलाई वैज्ञानिक र अनुमानयोग्य पनि बनाउन सक्नुपर्ने बताउनुभयो । उहाँले प्रयोग नहुने खालको तथ्याङ्क निकालिरहनु आवश्यक नभएको जानकारी दिनुभयो ।