विष्णुप्रसाद पोखरेल
दमक, वैशाख ४ गते । नेकपा एमालेका अध्यक्ष एवम् पूर्व प्रधानमन्त्री केपी शर्मा ओलीले ‘समृद्ध नेपाल सुखी नेपाली’ बनाउने अभियानमा लाग्नका लागि पार्टीका नेता तथा कार्यकर्ताहरूलाई निर्देशन दिनुभएको छ ।
झापा र इलामका विभिन्न कार्यक्रममा सहभागी हुनका मंगलबार दिउँसो झापा आउनुभएका ओलीले झापामा पार्टीका नव निर्वाचित पदाधिकारी तथा सदस्यहरूलाई जनहितमा अधिकतम रूपमा लाग्न अनुरोध गर्दै यस्तो निर्देशन दिनुभएको हो । "जनताका आंकाक्षा र अपेक्षा अनुसार काम गर्नुपर्छ", उहाँले भन्नुभयो । उहाँले एकताबद्ध भएर पार्टी काम लाग्न निर्देशन दिनुहुँदै नेतृत्व छान्ने क्रममा केही असन्तुष्टिहरू भएको भए त्यो बिर्सन पनि आग्रह गर्नुभयो । "जनताको सेवा गर्ने कार्यमा एकताबद्ध भएर जानुपर्छ", उहाँले भन्नुभयो ।
ओली तीन दिनसम्म इलाम र झापा रहने कार्यक्रम रहेको नेकपा एमालेका केन्द्रीय सदस्य दीपक कार्कीले बताउनुभएको छ । इलाममा हुने चुनावी सभालाई सम्बोधन गर्न ओली मंगलवार नै इलाम जाने र बुधबार गृह नगर दमक आउने कार्यक्रम रहेको कार्कीले जानकारी दिनुभयो ।
इलामको क्षेत्र नं २ मा उपनिर्वाचन हुँदैछ । क्षेत्र-२ का एमाले उम्मेदवार सुहाङ नेम्वाङ सहित मंगलवारेमा बुधबार चुनावी सभा छ । यसैगरी बिहीबार आफ्नो निर्वाचन क्षेत्र गौरादह नगरपालिका ५ स्थित स्कूलचौनमा कार्यक्रम छ ।
