कोकिला भण्डारी
धनकुटा, चैत २५ गते । धनकुटा नगरपालिका १० स्थित पारिपात्लेमा रहेको एक घरमा आइतबार आगलागी हुँदा जलेर नष्ट भएको छ । पीडित परिवारलाई धनकुटा नगरपालिका, रेडक्रसलगायतका संस्थाले राहत सहयोग प्रदान गरेका छन् ।
स्थानीय भिमबहादुर मगरको घरमा आगलागी हुँदा घर जलेर नष्ट भएको स्थानीयको भनाइ छ । स्थानीय काशिनाथ बरालका अनुसार कच्ची घरमा आगलागी हुँदा केही समयमै जलेर नष्ट भएको छ । घरनजिकको गोठ पनि जलेर नष्ट भएको उहाँले बताउनुभयो ।
आगलागीबाट घरमा भएका सामान, खानेकुरा, लत्ताकपडा, बाख्रा १, कुखुरा तीनसहित अन्य सामग्री जलेर नष्ट भएको उहाँले बताउनुभयो । आगो निभाउनेक्रममा मगर घाइते हुनुभएको छ । उहाँलाई जिल्ला अस्पतालमा उपचारका लागि पठाइएको वडा सदस्य सुरेसकुमार श्रेष्ठले जानकारी दिनुभयो।
