अर्घाखाँची, चैत २० गते । वन डढेलो नियन्त्रणमा उत्कृष्ट भूमिका निर्वाह गर्नेलाई पुरस्कृत गरिने भएको छ । गर्मी मौसममा जिल्लाका विभिन्न क्षेत्रमा डढेलो फैलिन सक्ने सम्भावना भएको र डढेलो नियन्त्रणमा योगदान दिने सङ्घ, संस्था, समूह र व्यक्तिलाई १० हजारका दरले पुरस्कृत गर्ने निर्णय गरिएको डिभिजन वन कार्यालयका वन अधिकृत मदन ढुङ्गानाले बताउनुभयो ।
डिभिजन वन कार्यालय अर्घाखाँचीको आयोजनामा भएको वन डढेलो रोकथाम तथा नियन्त्रणसम्बन्धी कार्यक्रम तथा जिल्ला वन समन्वय समिति र जिल्ला वन सुरक्षा समितिको संयुक्त बैठकमा डढेलो नियन्त्रण गर्नेलाई पुरस्कृत गर्ने निर्णय भएको हो ।
बैठकले डिभिजन वन कार्यालय अर्घाखाँचीको वन डढेलो नियन्त्रण कार्ययोजना स्थानीय तहको सुझावअनुसार स्वीकृत एवम् कार्यान्वयन गर्ने, डिभिजन वन कार्यालयको वार्षिक कार्यक्रमअनुसार वन डढेलो रोकथाम तथा नियन्त्रणका लागि जनचेतनामूलक नमुना कार्यक्रम सञ्चालन जारी राख्ने, स्थानीय तहहरूले वन डढेलो नियन्त्रणका लागि व्यापक प्रचारप्रसार तथा आवश्यक स्रोत व्यवस्थापन गर्नका लागि अनुरोध गर्ने लगायतका निर्णय गरेको डिभिजन वन कार्यालय अर्घाखाँचीका प्रमुख ईश्वरीप्रसाद पौडेलले जानकारी दिनुभयो ।
बैठकले जिल्लामा लाग्ने आकस्मिक डढेलो नियन्त्रण गर्न सुरक्षा निकाय एवम् वन कार्यालयको संयुक्त प्रयासबाट ‘क्विक रेस्पोन्स टिम’ गठन गरी परिचालन गर्ने पनि निर्णय गरेको छ । जिल्ला समन्वय समितिका प्रमुख जीवनारायण कोइरालाको अध्यक्षतामा बसेको सम्पन्न बैठकमा भूमिकास्थान नगरपालिकाका नगर प्रमुख झबिलाल थापा, छत्रदेव गाउँपालिकाका अध्यक्ष चन्द्रमान श्रेष्ठ, प्रमुख जिल्ला अधिकारी सूर्यबहादुर खत्री, जिल्लास्थित सुरक्षा निकायका प्रमुख तथा प्रतिनिधि, सामुदायिक वन उपभोक्ता समितिका प्रतिनिधिको उपस्थिति थियो । रासस
