लीलाराज खड्का
बिर्तामोड, चैत्र १८ गते । नेकपा एमाले झापाको ११ औँ जिल्ला अधिवेशनबाट अध्यक्षमा प्रेमबहादुर गिरी सर्वसम्मत हुनुभएको छ । यसअघि गिरी एमाले झापाका कार्यवाहक अध्यक्ष रहनुभएको थियो । यसै गरी अर्का अध्यक्षका प्रत्याशी शिव ढुङ्गेल भने उपाध्यक्ष पदमा सर्वसम्मत हुनुभएको छ । सचिवमा तुलसी कार्की सर्वसम्मत हुनुभएको छ ।
उपसचिवमा भने असारु राजवंशी, टीकाराम मग्राती र अनिता कन्दङबाले उम्मेदवारी दर्ता गर्नुभएको छ । चैत १५ गतेदेखि सुरु भएको जिल्ला अधिवेशनमा शुक्रवारबाट बन्द सत्र सुरु भएको हो । शनिवार दिउँसो भएको उम्मेदवारी दर्तामा तिन पदबाहेक सबै पदहरूमा आवश्यक सङ्ख्याभन्दा बढी उम्मेदवारी परेको छ । १५० सदस्यीय पदहरूमा ३५० जनाले उम्मेदवारी दिएको नेकपा एमाले झापा जिल्ला निर्वाचन कमिटीले जनाएको छ ।
नेतृत्व चयनमा सर्वसम्मत गर्ने प्रयास भइरहेकोले आइतबार गर्ने भनिएको मतदान सोमवारलाई सारिएको जनाइएको छ । सर्वसम्मत नभएको पदहरूमा भने सोमवारलाई निर्वाचनको मिति तोकिएको छ ।
अधिवेशनमा पालिकाबाट ४३० जना, जनसङ्गठनहरूबाट ८९ जना, मजदुरबाट ३० जना, सल्लाहकारहरू २५ जना, सम्पर्क मञ्चबाट पाँच जना र आयोजक १६९ जना एवम् मनोनीत प्रतिनिधिहरू ३८ जना गरी ७८६ जना सहभागी रहनुभएको छ ।
जिल्ला अधिवेशनबाट ५ जना पदाधिकारीसहित १५० जनाको जिल्ला कमिटी बन्ने छ । विभिन्न जन वर्गीय सङ्गठनहरूबाट पछि थप १५ जना मनोनीत हुनेछन् । अधिवेशनको उद्घाटन एमाले अध्यक्ष केपी शर्मा ओलीले गर्नुभएको थियो । झापा जिल्ला एमाले अध्यक्षसमेत रहनुभएको केपी शर्मा ओलीको गृह जिल्ला समेत भएकोले भरसक नेतृत्व सर्वसम्मत गर्नतर्फ दलका केन्द्रीय नेताहरू लागिपर्नुभएको बताइएको छ ।
