काठमाडौँ, मङ्सिर १५ गते । चलचित्र ‘रङ्गेली’ को नयाँ क्यारेक्टर पोस्टर सार्वजनिक गरिएको छ । अभिनेता अर्पण थापाको पात्रलाई ‘भगवान् दादा’ का रूपमा परिचय गराउँदै पोस्टर सार्वजनिक गरिएको हो । यसअघि अभिनेता दयाहाङ राई र अभिनेतृ मिरुना मगरको पात्र अनुसारका पोस्टर सार्वजनिक गरिएको थियो ।
‘रङ्गेली’ मा थापाले जबरजस्त भूमिका निर्वाह गरेको निर्देशक अर्जुन सुवेदीले बताउनुभयो । सुवेदीकै लेखन रहेको चलचित्रमा अर्पण, दयाहाङ र मिरुनाको प्रवीण खतिवडा, रमेश बुढाथोकीलगायतको प्रमुख भूमिका रहेको छ । चलचित्र आगामी फागुन २५ गते महाशिवरात्रिको दिन विश्वव्यापी रिलिज हुँदै छ । यस चलचित्रका गीतमा हर्क साउद, अर्जुन सुवेदी र सबिन सिंहको शब्द रचना तथा सुशान्त गौतम र हर्कुलस बस्नेतको सङ्गीत रहेको छ ।
चलचित्रका कार्यकारी निर्माताहरू जितेन्द्र खतिवडा र अनुजजङ्ग थापा हुन् । निर्माताहरू संसार चौलागाईं र रमेश भट्टराई वशिष्ठ हुन् भने युवक कार्की र शिवशङ्कर चौलागाईं सह–निर्माता हुनुहुन्छ भने विवेक खड्का (योलो) एसोसिएट निर्माता र छायाकार सुशन प्रजापति रहनुभएको छ ।
अस्ट्रेलिया र अमेरिकामा कलाकारसहित भिआइपी रेड कार्पेट प्रिमियर हुने यो चलचित्र नेपालसँगै नेपालीहरूको बसोबास रहेका अमेरिका, अस्ट्रेलिया, जापान, कोरिया, हङकङलगायतका विश्वका विभिन्न मुलुकमा एकसाथ रिलिज हुने छ । जापान, कोरिया र हङकङमा उज्ज्वल गुरागाईं र युएनए इन्टरटेनमेन्ट, अमेरिकामा ‘एक्का बास्सा इन्टरटेनमेन्ट’ र ‘लाइभ एट प्रिजेन्ट’ तथा अस्ट्रेलियामा ‘हट बिट्स इभेन्ट्स’ ले ‘रङ्गेली’ रिलिज गर्दै छन् ।
