काठमाडौं, कात्तिक २१ गते । नेपालले एएफसी एसिया कप २०२७ र फिफा विश्वकप २०२६ छनोटको दोस्रो चरणअन्तर्गत यमनविरुद्धको पहिलो लिगका लागि तयारी थालेको छ ।
नेपालले आगामी मङ्सिर ५ गते घरेलु मैदानमा यमनविरुद्ध विश्वकप छनोटअन्तर्गत दोस्रो चरणको खेल खेल्दैछ । नेपाली फुटबलको प्रशासकीय निकाय अखिल नेपाल फुटबल सङ्घ (एन्फा) ले मङ्गलबार दशरथ रङ्गशालामा पत्रकार सम्मेलन गर्दै यमनविरुद्धको खेलका लागि आवश्यक तयारी गरिरहेको जानकारी दिएको हो । दोस्रो चरणको छनोटमा नेपाल समूह ‘ए’ मा छ । चार राष्ट्र रहेको यस समूहमा नेपालले यमनसँग दोस्रो खेल खेल्न लागेको हो । त्यसअघि नेपालले संयुक्त अरब इमिरेट्स (युएई) सँग खेल्दैछ ।
नेपालले यमनसँग पहिलो लिग मङ्सिर ५ गते त्रिपुरेश्वरस्थित दशरथ रङ्गशालामा साँझ ७ बजे हुनेछ । प्रारम्भिक चरणमा लाओसलाई हराउँदै नेपालले दोस्रो चरणको यात्रा तय गरेको हो । नेपालले अब आफूभन्दा बलियो राष्ट्रसँग दोस्रो चरणमा खेल्नेछ । फिफा वरियतामा नेपाल १७६ औँ स्थानमा रहेको नेपालले १५६ औँ स्थानको यमनको सामना गर्नेछ । यसअघि घरेलु मैदानमा अन्तर्राष्ट्रिय खेलहरू प्रायः साँझ ५ः३० बजे हुने गरेको थियो ।
यस पटक भने एन्फाले नेपाली टोलीका मुख्य प्रशिक्षक भिन्सेन्जो अल्बर्टो एनेसको सल्लाहअनुसार खेल साढे एक घण्टापछि सारेको छ । एन्फाको प्रतियोगिता निर्देशक सञ्जीव मिश्रले प्रशिक्षकले साँझ सात बजे खेलाउँदा टोलीका लागि पनि राम्रो हुने भएकाले साँझ सात बजे खेल सारिएको बताउनु भयो । समर्थकलाई जाडो मौसममा ढिलो खेल हुँदा रङ्गशाला पुगेर खेल हेर्न कठिन हुने भएकाले एन्फाले त्यसको आवश्यक विकल्प खोज्ने जनाएको छ ।
एन्फाले त्यो समयमा चक्रपथमा २० देखि २५ वटा बसको व्यवस्था गर्ने जनाएको छ । एन्फाले उक्त खेलको टिकटदर साधारण प्यारापिटतर्फ चार सय र भिआइपी प्याराफिटमा एक हजार रुपियाँ तोकेको छ । एन्फाका प्रवक्ता सुरेश साहले मुख्य प्रशिक्षक भिन्सेन्जो अल्बर्टो एनेसको प्रशिक्षणमा हाल २६ सदस्यीय टोली बन्द प्रशिक्षणमा रहेको उल्लेख गर्नुभयो । उनले छनोट खेलका लागि एन्फाले सबै तयारी अगाडि बढाएको बताउनु भयो ।
एन्फाले प्रतियोगिताको अनुमानित बजेट ५५ हजार ६ सय ८० अमेरिकी डलर रहेको जनाएको छ । नेपालले समूहको पहिलो खेल संयुक्त अरब इमिरेट्स (युएई) विरुद्ध कात्तिक ३० गते खेल्दैछ । त्यसका लागि नेपाली टोली आगामी कात्तिक २६ गते दुबई प्रस्थान गर्दैछ । नेपालले त्यो खेल भने राति ९ः३० बजे खेल्नेछ ।
