काठमाडौं, जेठ ५ गते । निर्देशक बाबु साहेब बलामीको निर्देशनमा निर्माण हुन लागेको फिल्म 'देववाणी'को शुक्रबार बिहान राजधानीको भद्रकालीमा मुहूर्त गरिएको छ । पूजाआजासहितको मुहूर्तमा फिल्मका प्रमुख कलाकार कुन्दन भारद्वाज, अनुजा लेप्चा र रवीन्द्र झाले मुहूर्त सट दिनुभएको हो ।
मौसम फिल्मस् प्रोडक्सन हाउस र अनुजा इन्टरटेनमेन्टको ब्यानरमा निर्माण हुने फिल्मको छायाङ्कन सिमरा, वीरगन्ज, इटहरी र काठमाडौंमा हुनेछ । फिल्ममा कुन्दन भारद्वाज, अनुजा लेप्चा सुनिल थापा, ध्रुव कोइराला, नन्दु श्रीवास्तव, अमिता श्राप, मौसम पौडेल, देव सिंह, प्रदीप ढकाल, सरिता भण्डारी, लक्ष्मीनाथ तिमल्सिना, काजोल राघवाणी र मौसम पौडेलको अभिनय रहनेछ ।
फिल्ममा नीराजन मेहता मन्जिलको कथा, हरिबहादुर घलेको छायाङ्कन र श्री श्रेष्ठको द्वन्द्व रहनेछ ।
मौसम पौडेल प्रस्तुतकर्ता रहेको फिल्ममा मिना खड्का र हिराबहादुर लेप्चा निर्माता हुनुहुन्छ । महेन्द्र यादव कार्यकारी निर्माता रहेको फिल्ममा तेञ्जु योञ्जनको कोरियोग्राफी, मनोहर सुनामको सङ्गीत र तर्कराज न्यौपानेको मुख्य सहायक निर्देशन रहनेछ ।
फिल्म नेपाली र हिन्दी भाषामा निर्माण हुनेछ ।
