गोरखापत्र अनलाइन
मुगु, वैशाख १९ गते । रैथाने संस्कृति र प्राकृतिक सौन्दर्यको अध्ययन तथा अवलोकन गर्ने उद्देश्यले नेपाल प्रज्ञा प्रतिष्ठान, प्राज्ञ परिषद् रारा तालबाट पाँच बुँदे रारा घोषणापत्र जारी गरेको छ । ‘सबै भाषा, सबै ज्ञान, सबैको प्रज्ञा प्रतिष्ठान’ भन्ने मूल नाराकासाथ रारा तालको किनारामा पहिलो पटक नेपाल प्रज्ञा प्रतिष्ठान, प्राज्ञ परिषद्को ऐतिहासिक बैठक कुलपति भूपाल राईको अध्यक्षतामा सम्पन्न भएको छ ।
बैठकले पाँच बुँदे रारा घोषणापत्र २०८० सार्वजनिक गर्दै नेपालको भाषिक तथा सांस्कृतिक विविधतालाई आत्मैदेवी स्वीकार गर्ने प्रतिष्ठानलाई साझा थलो बनाउने जनाएको छ । घोषणापत्रमा सङ्घीय गणतन्त्र नेपालको मूल्य र मान्यतालाई आत्मसात् गर्दै परिवर्तनको सौन्दर्यलाई स्थापित गर्ने, प्राज्ञ र प्राज्ञिक कर्मको जग उच्च नैतिकता, स्वच्छ संस्कार र छविको हुने हुनाले सोहीअनुसारको कर्मलाई अनुसरण गरिने गराइने उल्लेख छ ।
त्यस्तै, ज्ञानका बहुविध क्षेत्र र स्रोतहरूका बहस, अध्ययन, अनुसन्धान र अभ्यासलाई जोड दिने, आजको युगमा प्रश्न जुनसुकै क्षेत्र, तह तप्कामा आवश्यक छ । प्रश्न नै समाज रूपान्तरणको पहिलो आधार हो । त्यसैले प्रश्न आफैँसँग पनि गर्ने, प्रश्न सँगसँगै काम प्रतिवद्धता जनाइएको छ ।
पाँच बुँदे रारा घोषणापत्र नेपाल प्रज्ञा प्रतिष्ठानको उच्च प्राज्ञिक खोज अनुसन्धानका लागि कोसेढुङ्गा साबित हुनेमा आफू आश्वस्त रहेको कुरा प्रतिष्ठानका कुलपति भूपाल राईले बताउनुभयो ।
