कालीकोट, समाचारदाता
कालीकोट, चैत १२ गते । जिल्लाको तिलागुफा नगरपालिकाभित्र रहेका धामीझाँक्रीले बालविवाह अन्त्यका लागि साझा प्रतिबद्धता जनाएका छन्। शुक्रबार नगरपालिकामा भेला भएका धामीझाँक्रीले समाजमा रहेको बालविवाहलाई रोक्न सातबँदे प्रतिबद्धता जनाएका हुन्। गाउँमा हुने बालविवाहलाई रोक्न धामीझाँक्री र पुरोहितलाई परिचालन गर्न आयोजना गरिएको सम्मेलनमा सो प्रतिबद्धता जनाइएको हो।
नगरपालिकाले धामीझाँक्री र पुरोहितको सम्मेलन गरी बालविवाह रोक्न धामीझाँक्रीलाई परिचालन गर्ने भएको हो। धामीझाँक्री र पुरोहितका तर्फबाट बालविवाह नगर्ने र नगराउने, बालविवाह अन्त्यका लागि सबै धामीझाँक्री र पुरोहित एकजुट हुने, बालविवाह गर्ने र गराउने ठाउँका भोजभतेर तथा निम्तोमा नजाने प्रतिबद्धता उनीहरूले गरेका छन्। यस्तै बालविवाह गर्ने र गराउनेलाई कानुनी दायरामा ल्याउन सहयोग गर्ने, विवाहको लगन दिँदा जन्मदर्ता वा जन्ममिति खुल्ने प्रमाण माग्ने, २० वर्ष उमेर भएको भए मात्र लगन दिने, छोराछोरीलाई शिक्षामा समान अवसर प्रदान गर्न सचेतना फैलाउने, धामीझाँक्री उपस्थिति हुने हरेक धार्मिक कार्यमा बालविवाहविरुद्ध छलफल तथा बहस गर्ने प्रतिबद्धता पनि उनीहरूले गरेका छन्।
सो अवसरमा नगर उपप्रमुख महेन्द्रबहादुर शाहीले विवाहका लागि लगन जुराउने पुरोहित भएकाले उनीहरूलाई भेला गरेर परिचालनसँगै प्रतिबद्धता गराइएको बताउनुभयो। उहाँले बालबिवाह रोक्न धामीझाँक्री तथा पुरोहितको निकै महत्वपूर्ण भूमिका हुने बताउनुभयो। सो अवसरमा बालविवाहविरुद्ध अभियानमा सहभागी एक सय जना धामीझाँक्रीलाई सम्मानसमेत गरिएको छ।
