काठमाडौँ,चैत १ गते । चलचित्र ‘नीरफूल’ले आउँदो जेठ १९ गते आफ्नो प्रदर्शन मिति तय गरेको छ । २०७६ चैत ७ गते प्रदर्शन हुनै लाग्दा सरकारले त्यसको दुई दिनअघि मात्रै कोरोना महामारीका कारण सम्पूर्ण चलचित्र हल बन्द गरेपछि ‘नीरफूल’को प्रदर्शन मिति रोकिएको थियो ।
भूकम्पका कारण बिछोडिएका एक परिवारका सदस्यहरूले पुनर्मिलनका लागि गरेका प्रयत्नमा आधारित चलचित्र फूलमान बलले निर्देशन गर्नुभएको हो । रुवी भ्याली र काठमाडौँमा छायाङ्कन गरिएको चलचित्रमा दयाहाङ राई, शान्ति वाइबा, बुद्धि तामाङ, पुष्कर गुरुङ, जिम्मे छ्योइकी घिसिङ, राजन खतिवडा, सरोज अर्याल, सरिता गिरीलगायतले अभिनय गर्नुभएको छ । म्यानमारका तत्कालीन राजदूत उ लिउन उ र अभिनेत्री रेखा थापालाई विशेष भूमिकामा हेर्न सकिन्छ । चलचित्रमा प्रमोद कार्कीको छायाङ्कन, अर्जुन पोखरेल र चन्द्रकुमार दोङको सङ्गीत एवं निमेष श्रेष्ठको सम्पादन रहेको छ ।
