काठमाडौं, कात्तिक २९ गते । काठमाडौं महानगरपालिकाका प्रमुख बालेन्द्र साहसँग नेपालका लागि जर्मनीका राजदूत डा. थोमास प्रिन्सले शिष्टाचार भेट गर्नुभएको छ । मङ्गलबार प्रमुख साहको कार्यकक्षमा उहाँहरुबीच भेटवार्ता भएको हो ।
भेटका क्रममा प्रमुख साहले फोहोरको दिगो व्यवस्थापनका लागि सरल, सहज र छिटो परिणाम प्राप्त हुने प्रविधिलाई प्राथमिकता दिने बताउनुभयो । राजदूत प्रिन्सले फोहोर व्यवस्थापनमा जर्मन सरकारले गरेको सहयोगको प्रसङ्गमा चर्चा गर्नुहुँदै अहिलेको अवस्थामा बारे जानकारी लिन चाहेपछि प्रमुख साहले आफ्नो योजना सुनाउनुभएको थियो ।
प्रमुख साहले भन्नुभयो, ‘‘फोहोर व्यवस्थापनका लागि धेरै प्रविधि छन् । हामीसँग प्रस्ताव पनि धेरै छन् । तीमध्ये वर्गीकृत फोहोरलाई प्रकृतिअनुसार व्यवस्थापन गर्न सकिने दिगो प्रविधि हाम्रो प्राथमिकतामा छ ।’’
महानगरका प्राथमिक कार्यक्रमका बारेमा जानकारी दिनुहुँदै प्रमुख साहले, मूर्त अमूर्त सांस्कृतिक सम्पदाको संरक्षण, संवर्द्धन र पुनर्स्थापना, खुल्ला तथा सार्वजनिक स्थलको संरक्षण, पार्क निर्माण शैक्षिक गुणस्तरको वृद्धि तथा स्वास्थ्य सेवाको पहुँच वृद्धिलगायत क्षेत्रमा काम भइरहेको बताउनुभयो ।
फोहोरको वर्गीकरण र व्यवस्थापनका लागि जर्मन सरकारले जीटीजेड कार्यक्रममार्फत काठमाडौं महानगरलाई सहयोग गरेको थियो । राजदूत प्रिन्सले आपसी सहयोगका विषयमा कुरा गर्नुहुँदै परम्परागत सङ्गीत शिक्षण तथा प्रवर्द्धनका लागि सहयोगको इच्छा व्यक्त गर्नुभएको थियो । उहाँले सहरी विकास, निर्माण र व्यवस्थापनका विषयमा चासो राख्नुभएको थियो ।
भेटका क्रममा महानगरका पूर्वाधार सल्लाहकार एवम् सविचवालय सदस्य सुनिल लम्साल, सम्पदा तथा पर्यटन विभागका प्रमुख अर्चना श्रेष्ठसहित अधिकारी सहभागी हुनुहुन्थ्यो ।
