गोरखापत्र अनलाइन
काठमाडौं, भदौ ४ गते । सत्तारुढ दल नेपाली कांग्रेसका महामन्त्री विश्वप्रकाश शर्माले दुई पटकभन्दा बढी प्रधानमन्त्री हुन नपाउने व्यवस्था गर्नुपर्ने प्रस्ताव गर्नुभएको छ । एक पटक राष्ट्रपति, दुई पटकसम्म प्रधानमन्त्री, तीन पटकसम्म मन्त्री र चार पटकभन्दा बढी सांसद हुन नपाउने व्यवस्था गर्न उपयुक्त हुने धारणा उहाँको छ ।
एक पटक राष्ट्रपति, दुई पटक प्रधानमन्त्री, तीन पटक मन्त्री र चार पटकभन्दा बढी सांसद हुन नपाउने व्यवस्था गरिनुपर्छ ।
शनिबार काठमाडौंमा आयोजित युवाहरुसँगको अन्तरक्रिया कार्यक्रममा महामन्त्री शर्माले सो कुरा बताउनुभएको हो । राजनीतिलाई सिंहदरवारबाटै रुपान्तरण गर्ने हो भने एउटै व्यक्तिलाई सिंहदरवार छिर्ने अधिकार पटक पटक दिनु हुँदैन उहाँले भन्नुभयो, “राजनीतिलाई दुश्मनीको रुपमा लिनेगरी अभिव्यक्ति दिनु हुन्न, दलहरुले आफ्नो नीति, सिद्धान्त र कार्यक्रमको कुरा गर्नुपर्छ, गालीगलौज होइन ।” एकअर्काप्रति दुश्मनी साँध्नेगरी नेताहरुको अभिव्यक्ति आउनु गलत भएको पनि उहाँले चर्चा गर्नुभयो । उहाँले भन्नुभयो, ‘एक पटक राष्ट्रपति, दुई पटक प्रधानमन्त्री, तीन पटक मन्त्री र चार पटकभन्दा बढी सांसद हुन नपाउने व्यवस्था गरिनुपर्छ । राजनीतिलाई रुपान्तरण गर्ने हो भने त्यसको सुरुवात सिंहदरवारबाटै हुुनुपर्छ ।’
महामन्त्री शर्माले युवाहरुको लागि लोकतन्त्र र विकास अनिवार्य रहेको बताउनुभयो । जनताको सेवाको कामलाई सहज बनाउन सरकारले ध्यान केन्द्रित गर्नुपर्ने आवश्यक्ता पनि उहाँले औंल्याउनु भयो ।
