काठमाडौं, साउन २८ गते । स्पेनिस ला लिगामा नयाँ सिजनको सुरुवातमै सेभियालाई ओसासुनाको नमिठो झट्का लागेको छ । शुक्रबार रातिदेखि सुरु भएको ला लिगाको पहिलो खेलमा सेभिया ओसासुनासँग उसैको मैदानमा २–१ गोलले पराजित भयो ।
घरेलु मैदानमा ओसासुनालाई जिताउन इजिक्वेल एभिला र एइमज ओरोजले गोल गर्नुभयो । सेभियाका राफा मिरको गोल सान्त्वना बन्यो । प्रतिस्पर्धात्मक खेलमा ओसासुनाले नवौं मिनेटमा इजिक्वेल एभिलाको गोलबाट सुरुवाती अग्रता लिएको थियो ।
दुई मिनेट लगत्यै राफा मिरले गोल गर्दै खेललाई १–१ गोलको बराबरीमा ल्याउनुभयो । त्यसपछि ७४औं मिनेटमा एइमज ओरोजले गोल गर्दै ओसासुनालाई जिताउनुभयो । सिजनको पहिलो जितसँगै ओसासुनाले तीन अङ्क बनाएको छ । सेभियाले हारबाट सिजनको सुरुवात गरेको छ । एजेन्सी
