काठमाडौँ, वैशाख २८ गते । शिक्षा, विज्ञान तथा प्रविधिमन्त्री सस्मित पोखरेलसँग संयुक्त राष्ट्रसङ्घको नेपालस्थित आवासीय संयोजक लीला पिटर्स याहिमा लगायत राष्ट्रसङ्घ अन्तर्गतका अन्य नियोगहरूको प्रतिनिधिमण्डलले शिष्टाचार भेटवार्ता गरेको छ।
सिंहदरबारस्थित मन्त्रालयमा सोमबार भएको भेटमा आपसी सम्बन्ध र द्विपक्षीय हितका विषयमा कुराकानी भएको छ। साथै, संयुक्त राष्ट्रसङ्घका नियोगबाट नेपालको शिक्षा क्षेत्रमा रहँदै आएको सहकार्य र सहयोगका सन्दर्भमा समेत छलफल भएको छ।
शिक्षामन्त्रीसँगको उक्त भेटमा संयुक्त राष्ट्रसङ्घीय बाल कोष (युनिसेफ)का निमित्त देशीय प्रतिनिधि जि हुनरा, विश्व खाद्य कार्यक्रम (डब्लुएफपी), संयुक्त राष्ट्र सङ्घीय जनसङ्ख्या कोष (युएनएफपिए), अन्तर्राष्ट्रिय आप्रवासन सङ्गठन (आइओएम) लगायत राष्ट्रसङ्घका विभिन्न नियोगका प्रतिनिधिहरूको उपस्थिति थियो।
भेटमा शिक्षामन्त्री पोखरेलले राष्ट्रसङ्घीय नियोगहरूले शिक्षा क्षेत्रमा पुर्याउँदै आइरहेको साथ र सहयोगका लागि धन्यवाद ज्ञापन गर्नुभयो।
भेटमा विशेषगरी युनिसेफले नेपालको समावेशी शिक्षा, ‘इभिडेन्स बेस लर्निङ’, प्रविधिको प्रयोग, दिगो विकास लक्ष्यका उपलब्धि कार्यान्वयनका लागि समन्वय र सहकार्य, साक्षरता तथा जीवनपर्यन्त सिकाइको क्षेत्रमा गरिआएको सहयोगको विषयमा छलफल भएको छ। आइओएममार्फत विदेशमा रहेका विद्यार्थीको मानसिक स्वास्थ्यजस्ता विषयमा ध्यान दिनेबारे उहाँहरूबिच कुराकानी भएको छ।
साथै, विश्व खाद्य कार्यक्रम अन्तर्गत नेपालको विद्यालय दिवा खाजा कार्यक्रम अन्तर्गत पौष्टिक खाजाका लागि स्थानीय कृषकले उत्पादन गरेका सामग्री खाद्यमा जोड्ने तथा संयुक्त राष्ट्रसङ्घीय जनसङ्ख्या कोषले नेपालको शिक्षाको बृहत् यौनिक शिक्षा कार्यक्रम, ‘डिजिटल लर्निङ’ का क्षेत्रमा गरेको काम र संयुक्त राष्ट्रसङ्घीय बसाइसराइ सम्बन्धी अन्तर्राष्ट्रिय संस्थाले नेपालको सुरक्षित बसाइसराइको क्षेत्रमा पुर्याउँदै आएको सहयोग र भविष्यमा गर्न सकिने सहयोगका क्षेत्रहरूमा केन्द्रित रहेर कुराकानी भएको छ।
शिक्षामन्त्री पोखरेलले अबका दिनमा समावेशी शिक्षा, शिक्षकको पेसागत विकास, शिक्षा, विज्ञान र प्रविधिको प्रयोग, डिजिटल लर्निङलगायत क्षेत्रमा थप सहकार्य गर्नका लागि मन्त्रालय इच्छुक रहेको विचार व्यक्त गर्नुभयो।
आवासीय प्रतिनिधि याहिमाले शिक्षा क्षेत्रमा संयुक्त राष्ट्रसङ्घका नियोगहरूको प्राथमिकता रहेको र आगामी दिनहरूमा पनि सहकार्य र सहयोग निरन्तर रहने प्रतिबद्धता व्यक्त गर्नुभयो।
