विष्णुप्रसाद पोखरेल
दमक, वैशाख १७ गते । झापाको कचनकवल गाउँपालिका–३, दलकीस्थित अभिमुक्तरेश्वर सामुदायिक वन अगाडि बिहीबार बिहान भएको स्कुल बस दुर्घटनामा एक दर्जनभन्दा बढी विद्यार्थी घाइते भएका छन् ।
जिल्ला प्रहरी कार्यालय झापाका प्रवक्ता कृष्णबहादुर खड्काका अनुसार बिहान करिब ९ः२५ बजे दुर्गाभिट्टाबाट आमबारीतर्फ जाँदै गरेको प्र. १–०१–००१ ख. ४४८२ नम्बरको विद्यापानी सेकेन्डरी स्कुलको बस दुर्घटना भएको हो ।
प्रारम्भिक अनुसन्धान अनुसार बाटोमा निस्किएको प्र. १–०१–०१३ प. ३४०३ नम्बरको मोटरसाइकललाई बसले ठक्कर दिएको थियो । ठक्करपछि बस अनियन्त्रित भई पल्टिँदा बसमा सवार १३ जना विद्यार्थी घाइते बनेका छन् । बसमा २० जना विद्यार्थी सवार रहेका थिए ।
दुर्घटनामा मोटरसाइकल चालक कचनकवल–३ निवासी ५२ वर्षीय ओमप्रसाद तिम्सिनाको मुख, टाउको र बायाँ खुट्टामा चोट लागेको प्रहरीले जनाएको छ ।
यसैगरी घाइते विद्यार्थीलाई उद्धार गरेर अस्पताल पुर्याइएको छ । मनमोहन अस्पताल, बिर्तामोडमा उपचार भइरहेको छ । घाइते हुने विद्यार्थीमा अभिषेक राजवंशी, अर्जुन राजवंशी, धर्मेन्द्र राजवंशी, खुश्बु श्रेष्ठ, करण राजवंशी, प्रतिक्षा राजवंशी, बर्टिका राजवंशी, सुमन राजवंशी, श्रृजना राजवंशी लगायत रहेका छन् ।
सबै विद्यार्थीको अवस्था खतरामुक्त रहेको प्रहरीले जनाएको छ । दुर्घटनापछि बस चालक फरार रहेको र खोजी कार्य भइरहेको खड्काले जानकारी दिनुभयो ।
-original-thumb.jpg)
