विजयकुमार साह
ढल्केबर, वैशाख १० गते। विगत केही वर्षदेखि अलपत्र अवस्थामा रहेको धनुषाधाम–रघुनाथपुर सडकखण्डको निर्माण कार्य पाँच दिनभित्र सुरु गर्ने सहमति भएपछि पूर्वाधार विकास कार्यालय, धनुषामा लगाइएको ताला खोलिएको छ । सडक निर्माणमा सम्बन्धित निकायले उदासीनता देखाएको भन्दै रघुनाथपुरका स्थानीय बासिन्दाले बिहीबार मध्याह्न १२ बजे जनकपुरस्थित सो कार्यालयमा तालाबन्दी गरेका थिए ।
रघुनाथपुरका स्थानीय सुरेश यादवका अनुसार कार्यालय प्रमुख सञ्जीव साहसँग भएको छलफलमा आगामी वैशाख १५ गतेभित्र निर्माण कार्य पुनः थाल्ने प्रतिबद्धता आएपछि ताला खोलिएको हो । "कार्यालय प्रमुखले पाँच दिनभित्र काम सुरु गर्ने लिखित प्रतिबद्धता जनाउनुभएको छ, त्यसैले हाललाई आन्दोलन स्थगित गरी ताला खोलेका हौँ," यादवले भन्नुभयो ।
मधेश प्रदेश सरकारको ‘एक निर्वाचन क्षेत्र, एक सडक’ कार्यक्रम अन्तर्गत आर्थिक वर्ष २०७८/०७९ मा सो सडक निर्माणको ठेक्का लागेको थियो । करिब पाँच किलोमिटर लम्बाइको उक्त सडकमध्ये सुरुवाती चरणमा केही खण्ड मात्र निर्माण भए पनि बाँकी काम वर्षौंदेखि ठप्प छ । स्थानीयले पटक–पटक ताकेता गर्दा कार्यालय र ठेकेदारले एक अर्कालाई दोषारोपण गर्दै जिम्मेवारीबाट पन्छिने गरेको आरोप लगाएका छन् ।
सडक अलपत्र हुँदा वर्षायाममा हिलाम्मे भएर आवागमनमा निकै सास्ती हुने गरेको स्थानीयको गुनासो छ । कार्यालय प्रमुख साहले केही प्राविधिक समस्याका कारण निर्माण कार्य रोकिएको स्पष्ट पार्दै सहमति अनुसार नै तोकिएको समयभित्र काम सुरु गरिने विश्वास दिलाउनुभयो । यद्यपि, सहमति बमोजिम काम नभए पुनः सशक्त आन्दोलन गर्ने चेतावनी स्थानीयले दिएका छन् ।
