लीलाधर वली
घोराही, चैत १७ गते । घोराहीस्थित राप्ती स्वास्थ्य विज्ञान प्रतिष्ठानले चार सय शय्याको नयाँ अस्पताल निर्माणका लागि करिब ५ कट्ठा जग्गा खाली गरिसकेको छ । तर बहुवर्षीय ठेक्का स्वीकृति र स्रोत सुनिश्चित नहुँदा भवन निर्माणको काम अघि बढ्न सकेको छैन ।
अस्पताल भवन निर्माणका लागि चालु आर्थिक वर्षमै ठेक्का लगाउनुपर्ने भए पनि समय कम र अनुमति नपाउँदा चुनौती थपिएको छ । प्रतिष्ठानले घोराही–१४ स्थित ट्राफिक चोकमा निर्माण गर्न लागेको चार सय शय्याको अस्पतालका लागि सरकारले कुल ८८ करोड रुपियाँ बिनियोजन गरेको छ, जसमध्ये ७७ करोड रुपियाँ प्रतिष्ठानलाई पठाइसकेको छ ।
निमित्त उपकुलपति श्याम लम्सालका अनुसार, चालु आर्थिक वर्षभित्रै निर्माण अघि बढाउने तयारी भए पनि अर्थ मन्त्रालयबाट बहुवर्षीय ठेक्का स्वीकृति र स्रोत सुनिश्चित नपाएको कारण प्रक्रिया रोकिएको छ । प्रतिष्ठानले आवश्यक सबै मापदण्ड पूरा गरेर फाइल राष्ट्रिय योजना आयोगमा पठाइसकेको र स्वास्थ्य मन्त्रालय हुँदै अर्थ मन्त्रालयबाट स्वीकृति पाएपछि असार महिनासम्म ठेक्का लगाउन सकिने लम्सालले जानकारी दिनुभयो ।
उहाँले भन्नुभयो, “अहिलेसम्म विभिन्न कारणले स्वीकृति नपाउँदा ढिलाइ भएको हो। नयाँ सरकार गठन भएसँगै बहुवर्षीय ठेक्का स्वीकृति र स्रोत सुनिश्चित भएसँगै असारसम्म ठेक्का सम्झौता हुनेछ। बिनियोजन भएको बजेट फ्रिज हुनबाट बचाउन छिटो ठेक्का प्रक्रियालाई अघि बढाउन आवश्यक छ।”
प्रतिष्ठानको चार सय बेडको नयाँ भवन निर्माणमा करिब ४ अर्ब ५१ करोड रुपियाँ लागत लाग्ने अनुमान गरिएको छ । यसअघिदेखि प्रतिष्ठानले पुरानो भवनबाट तीन सय शय्याको अस्पताल सेवा, एमबिबिएस, बीएससी नर्सिङ, बीएनएस कक्षा लगायत शैक्षिक कार्यक्रम सञ्चालन गर्दै आएको छ ।
