बिकास अधिकारी
पश्चिम नवलपरासी, चैत १० गते । स्वास्थ्य कार्यालय पश्चिम नवलपरासी क्षयरोग नियन्त्रण तथा व्यवस्थापनको क्षेत्रमा देशकै उत्कृष्ट भएको छ । विश्व क्षयरोग दिवस २०८२ को अवसरमा काठमाडाैंमा आयोजित कार्यक्रममा स्वास्थ्य मन्त्रालयका सचिव डा. विकास देवकोटा स्वास्थ्य कार्यालय नवलपरासीका प्रमुख अंगद बहादुर शाहीलाई प्रमाणपत्रसहित सम्मान गर्नुभएकाे हाे ।
सम्मान समारोहमा बोल्दै सचिव देवकोटाले विविध चुनौतीका बाबजुद पनि क्षयरोग नियन्त्रण तथा व्यवस्थापनमा नवलपरासीले उत्कृष्ट उपलब्धि हासिल गरेको बताउँदै रोगी पहिचानको काममा ध्यान दिन सबैमा आग्रह गर्नुभयो ।
स्वास्थ्य कार्यलयका प्रमुख शाहीले समयमै पहिचान, प्रभावकारी उपचार, बिरामीको नियमित निगरानी तथा समुदाय स्तरमा जनचेतना अभिवृद्धि जस्ता पक्षमा जिल्लाले उल्लेखनीय प्रगति गरेको आधारमा देशमै उत्कृष्ट भएको बताउनुभयो । "यो स्वास्थ्य कार्यालयको मात्र नभई सबै स्थानीय तह तथा सरोकारवाला सहयोगी निकायको साझा उपलब्धि हो," शाहीले भन्नुभयो ।
नवलपरासीमा क्षयरोगी खोजपडतालमा केही स्थानीय तहले प्रभावकारी रुपमा काम गरेका थिए । जसका कारण पनि नवलपरासीको सूचकाङ्कमा उल्लेख्य प्रगति भएको पाइएको छ । नवलपरासीमा चालु आर्थिक वर्षको हाल सम्मको अवधिमा ६ सय १० जना नयाँ क्षयरोगी पहिचान भएका छन् भने ८ महिनाको अवधिमा १० जना क्षयरोगीको मृत्यु भएको छ । गत आर्थिक वर्षमा १ हजार ६० जना नयाँ क्षयरोगीको पहिचान र १६ जनाको मृत्यु भएको थियो ।
गत आर्थिक वर्षमा ९३ जना उपचार पछि निको भएका थिए भने चालु आर्थिक वर्षको हाल सम्मको अवधिमा पनि नियमित औषधि सेवन पछि ८७ जना निको भएको स्वास्थ्य कार्यालयले जनाएको छ । जिल्लामा सबैभन्दा बढी क्षयरोगी रामग्राममा पहिचान भएका छन् । रामग्राम नगरपालिकाले गाउँ गाउँमा क्षयरोगी खोजपड्ताल अभियान सञ्चालन गरेको थियो । क्षयरोगीको पहिचान गर्ने र उपचारको दायरामा ल्याउने कामनै अहिलेको मुख्य चुनौती भएको स्वास्थ्य कार्यालय प्रमुख शाहीले बताउनुभयो ।
