- मृतकहरुको नामावलीसहित
- जिल्ला बझाङ बित्थडचिर गापा वडा नं ०७ बस्ने वर्ष ४० को केशबराज जोशी
- सोही स्थान बस्ने वर्ष १३ को अशोकराज जोशी
- सोही स्थान बस्ने वर्ष ३५ को बसन्त जोशी
- सोही स्थान बस्ने वर्ष ४१ को बिष्णु दत्त जोशी (उपचारको क्रममा)
- सोही स्थान बस्ने वर्ष ४२ को नरेश राज जोशी (उपचारको क्रममा)
- सोही जिल्लाको केदारस्यु गापा बस्ने वर्ष ६० को मोहन देव भट्ट
- सोही जिल्लाको जयपृथ्बी नपा ०७ बस्ने वर्ष ४० को बसन्त राज रतला
- जिल्ला बैतडी पुर्चौडी नपा ०७ बस्ने वर्ष ४० की पुष्पा अवस्थी
केशवराज भट्ट
वाशुलिङ बैतडी, माघ २२ गते। बैतडीको पुर्चौंडी नगरपालिकामा जन्ती बोकेको बस दुर्घटना हुँदा आठ जनाको मृत्यु भएको छ भने ४५ जना घाइते भएका छन्।
दुर्घटनामा परेर छ जनाको घटनास्थलमै मृत्यु भएको र दुई जनाको स्थानीय स्वास्थ्यचौकीमा उपचारका क्रममा मृत्यु भएको जिल्ला प्रहरी कार्यालय बैतडीका प्रवक्ता प्रहरी निरीक्षक बल्देव बडूले जानकारी दिनुभयो।
बिहीबार पुर्चौंडी नगरपालिकाको भवनेबाट जन्ती लिएर बझाङतर्फ फर्किरहेको सुपप्र ०२–००१ ख १११९ नम्बरको बस राति करिब ८ बजे पुर्चौंडी नगरपालिका–७ बडगाउँको मोडमा दुर्घटनामा परेको हो। बस सडकबाट करिब २०० मिटर तल खसेको प्रहरीले जनाएको छ।
घटनास्थलमा अहिले पनि उद्धार कार्य जारी रहेको छ। अँध्यारोका कारण उद्धारमा कठिनाइ भइरहेको पुर्चौंडी नगरपालिकाका स्वास्थ्य शाखा प्रमुख विनोद कुँवरले जानकारी दिनुभयो।
बसमा २७ पुरुष र १८ महिला गरी जम्मा ४५ जना सवार रहेका थिए। घाइतेमध्ये १६ जनाको अवस्था गम्भीर रहेकाले थप उपचारका लागि डडेल्धुरा अस्पताल पठाइएको स्वास्थ्य शाखा प्रमुख कुँवरले बताउनुभयो।
