लिमीका मतदाताद्वारा निर्वाचनको मिति सार्न माग

राजन रावत
हुम्ला, माघ १९ गते। नाम्खा गाउँपालिका–६ अन्तर्गत हिमालपारिको गाउँ लिमीका तीनै गाउँका स्थानीय मतदाताले आगामी फागुन २१ गते तय गरिएको प्रतिनिधिसभा सदस्यको निर्वाचनको मिति सार्न माग गरेका छन् ।

जाङ गाउँका सबै मतदाता काठमाडौँमा रहेका र अन्य दुई गाउँका अधिकांश मतदाता पनि गाउँबाहिर रहेकाले हिमपातका कारण मतदानमा सहभागी हुन नसकिने अवस्था सिर्जना भएको भन्दै उनीहरूले निर्वाचनको मिति सार्न माग गरेका हुन् ।

लिमीका वडा अध्यक्ष पाल्जोर तामाङका अनुसार लिमी जाने नाम्खा गाउँपालिका–५ स्थित ४ हजार ६७० मिटर उचाइको नारा लेक र ५ हजार मिटर उचाइको न्यालु नाका क्षेत्रमा बाक्लो हिमपात जमेकाले हाल आवतजावत पूर्ण रूपमा बन्द भएको छ । अझै पनि हिमपात पर्ने समय बाँकी रहेकाले फागुन २१ गतेअगाडि लिमी पुग्न सम्भव नरहेको उहाँले बताउनुभयो ।

लिमीमा स्थानीयहरूबिच बसेको अनौपचारिक बैठकले निर्वाचन आयोगसमक्ष निर्वाचनको मिति केही दिन पछाडि सार्न माग गर्ने सहमति गरेको वडा अध्यक्ष तामाङले जानकारी दिनुभयो । उहाँका अनुसार जाङ गाउँको मतदान केन्द्रमा हाल एक जना पनि मतदाता नरहेका छन् भने अन्य दुई गाउँमा पनि थोरै मतदाता मात्र उपस्थित छन् । यस्तो अवस्थामा फागुन २१ गते निर्वाचन सम्पन्न गर्न कठिन हुने भएकाले मिति सार्न वा अन्य वैकल्पिक व्यवस्था गर्न लिमीवासीको साझा माग रहेको उहाँले बताउनुभयो ।

लिमीका तीन मतदान केन्द्रमध्ये भृकुटी प्राथमिक विद्यालय मतदान केन्द्रमा २४७ जना, हिमशिखर प्राथमिक विद्यालय (तील) मतदान केन्द्रमा १३२ जना र सुनखनी प्राथमिक विद्यालय, हल्जी मतदान केन्द्रमा २९३ जना मतदाता रहेका छन् । तीनै मतदान केन्द्र गरी जम्मा ६७२ जना मतदाता रहेका भए पनि हाल गाउँमा करिब २० दशमलव ८८ प्रतिशत मतदाता मात्र उपस्थित रहने अनुमान गरिएको छ ।

नाम्खा गाउँपालिकाका अन्य क्षेत्र पनि हिमपातबाट प्रभावित भए पनि लिमी क्षेत्र सबैभन्दा बढी प्रभावित भएको मुख्य निर्वाचन अधिकृत निलकण्ठ बरालले बताउनुभयो। यस समस्याबारे निर्वाचन आयोगलाई जानकारी गराइसकिएको र आयोगबाट आउने निर्णय कार्यान्वयन गर्न आफूहरू तयार रहेको उहाँले जानकारी दिनुभयो ।