राधाकृष्ण डुम्रे
वालिङ (स्याङ्जा), माघ १९ गते । आगामी प्रतिनिधिसभाको निर्वाचन सुरक्षाका लागि स्याङ्जामा अपुग भएका निर्वाचन प्रहरी विभिन्न तीन जिल्लाबाट ल्याइएको छ । म्याद थप गरेर तथा दोस्रो पटक आह्वान गर्दा पनि निर्वाचन प्रहरीका लागि माग अनुसारको आवेदन नआएपछि बाहिरबाट ल्याइएको प्रहरीले जनाएको छ ।
स्याङ्जामा तनहुँबाट ६७, कास्कीबाट १३९ र नवलपरासीबाट २९० जना निर्वाचन प्रहरी जिल्लामा आएका जिल्ला प्रहरी कार्यालय स्याङ्जाका सूचना अधिकारी प्रहरी नायब उपरीक्षक प्रसन्न राज चौधरीले जानकारी दिनुभयो । उहाँका अनुसार स्याङ्जामा ५०७ जना निर्वाचन प्रहरी अपुग थियो ।
स्याङ्जामा नेपाल प्रहरी तर्फ एक हजार नौ सय ४७ र सशस्त्र प्रहरी तर्फ १७९ जना गरी दुई हजार १२६ जना निर्वाचन प्रहरीका लागि आवेदन माग गरिएकोमा १६१९ जना छनोटमा परेका थिए । तीन जिल्लाबाट ल्याइदा पनि अझै ११ जना अपुग रहेको चौधरीले जानकारी दिनुभयो ।
बाहिरी जिल्लाबाट आएका मध्ये ६७ जना वडा प्रहरी कार्यालय वालिङ, २९० जना ईलाका प्रहरी कार्यालय चापाकोट र १३९ जनालाई जिल्ला प्रहरी कार्यालय स्याङ्जामा राखेर तालिम दिईने प्रहरीले जनाएको छ । १० दिने तालिम आईतबारबाट सुरु भइसकेको चौधरीको भनाइ छ ।
-original-thumb.jpg)
