निर्वाचन लक्षित गतिविधि बढाउँदै दलका उम्मेदवार

रमेश विश्वकर्मा 
गुल्मी, माघ १७ गते। आगामी फागुन २१ गते हुने प्रतिनिधिसभा सदस्य निर्वाचनका लागि गुल्मीमा राजनीतिक दलका उम्मेदवारले निर्वाचन लक्षित गतिविधिहरु बढाउन थालेका छन् । विशेषगरी दलका उम्मेदवारहरु पार्टीको आन्तरिक भेटघाट, छलफलसँगै नेता कार्यकर्ताहरुको सल्लाह सुझावमा रणनीतिक योजनाहरु बनाउनमा व्यस्त देखिएका हुन् ।

दलका उम्मेदवारले जिल्लास्तरको छलफलसँगै क्षेत्र, पालिका, विभिन्न सम्पर्क समिति र वडास्तरका नेता कार्यकर्ताहरुबिचको भेटघाटलाई तीव्र रुपमा अगाडि बढाएका छन् । दलहरुले पनि निर्वाचनमा आफ्ना उम्मेदवार विजयी गराउने उदेश्यले रणनीतिक योजनासँगै हरेक तहमा निर्वाचन परिचालन र प्रचारप्रसार समिति समेत गठन गरेका छन् । दुई निर्वाचन क्षेत्र रहेको यस जिल्लामा दलका उम्मेदवारहरुको सम्पर्क कार्यालय समेत स्थापना गरिएको छ ।

निश्चित योजना बनाएर चुनावी प्रचारप्रसारमा हिँड्नका लागि दलहरुले तयारी गरिरहेका छन् । मुख्य राजनीतिक कांग्रेस, एमाले, नेकपा, रास्वपालगायतका दलहरुले संगठन विस्तार, पार्टी प्रवेश तथा विभिन्न प्रशिक्षणमूलक गतिविधिहरुमा सक्रिय देखिएका छन् । यहाँ मुख्य प्रतिस्पर्धामा चार दल नै रहेका छन् । यस जिल्लामा निर्वाचनका लागि राजनीतिक दल र स्वतन्त्र उम्मेदवारहरु ४३ जनाले मनोनयन दर्ता गराएका छन् ।

जसमा राजनीतिक दलबाट २० जना र स्वतन्त्र २३ जना गरी दुई निर्वाचन क्षेत्रमा ४३ जनाले मनोनयन दर्ता गराएका हुन् । क्षेत्र नम्बर–१ मा राजनीतिक दल र स्वतन्त्र उम्मेदवारहरु २१ जनाले मनोनयन दर्ता गराउनुभएको छ । जसमा ११ जना स्वतन्त्र उम्मेदवार हुनुहुन्छ । यस क्षेत्रमा मुख्य प्रतिस्पर्धामा नेपाली कांग्रेसका डा. चन्द्र भण्डारी, नेकपा एमालेका प्रदीप कुमार ज्ञवाली, नेपाली कम्युनिस्ट पार्टीका सूदर्शन बराल र राष्ट्रिय स्वतन्त्र पार्टीका सागर ढकाल हुनुहुन्छ ।

यसैगरी, क्षेत्र नम्बर–२ मा राजनीतिक दल र स्वतन्त्र उम्मेदवारहरु २२ जनाले मनोनयन दर्ता गराउनुभएको छ । जसमा १२ जना स्वतन्त्र उम्मेदवार हुनुहुन्छ । यस क्षेत्रमा मुख्य प्रतिस्पर्धामा नेपाली कांग्रेसका भुवनप्रसाद श्रेष्ठ, नेकपा एमालेका गोकर्णराज विष्ट, नेपाली कम्युनिष्ट पार्टीका श्रीराम महत र राष्ट्रिय स्वतन्त्र पार्टीका गोबिन्द पन्थी हुनुहुन्छ ।