बागमती प्रदेश सभामा छ स्थान रिक्त

मकवानपुर समाचारदाता

मकवानपुर, माघ ११ गते । बागमती प्रदेश सभा सदस्यले राजीनामा दिएका कारण छ स्थान प्रदेश सभा सदस्य रिक्त भएका छन् । बागमती प्रदेश सभा सचिवालयले छ जना प्रदेश सभा सदस्यको स्थान रिक्त भएको जनाएको छ ।

बागमती प्रदेश सभा सचिवालयले स्थान रिक्ततासम्बन्धी सूचना जारी गर्दै प्रदेश सभा सदस्यको स्थान रिक्त भएको जनाएको हो । प्रदेश सभाका सचिव रामकुमार पौडेलले प्रदेश सभा सदस्यले पदबाट राजीनामा दिनुभएसँगै प्रदेश सभा सदस्यको स्थान रिक्त भएको जानकारी दिनुभयो । 

उहाँले नेपाली कांग्रेस र राष्ट्रिय प्रजातन्त्र पार्टीका एक/एक जना, नेपाल कम्युनिस्ट पार्टी एमाले र नेपाली कम्युनिस्ट पार्टीका दुई/दुई जना गरी छ जना प्रदेश सभा सदस्यले प्रदेश सभाको सदस्य पदबाट राजीनामा दिनुभएको बताउनुभयो । सचिव पौडेलले प्रदेश सभा नियमावली २०७४ को नियम १८५ को उपनियम (२) बमोजिम प्रदेश सभा सदस्यको स्थान रिक्त भएको भन्दै स्थान रिक्त भएका बारेमा निर्वाचन आयोग र मुख्यमन्त्रीको कार्यालयमा जानकारीपत्र पठाइएको बताउनुभयो । निर्वाचन आयोगमा पत्र पुगेसँगै उपनिर्वाचनका लागि आयोगले आवश्यक प्रक्रिया अगाडि बढाउने छ । प्रदेश सभा सदस्यमा २०७९ को निर्वाचनमा दोलखा १ (क) बाट निर्वाचित कांग्रेसका कुन्दनराज काफ्ले, काठमाडौँको ६ (ख) बाट निर्वाचित एमालेका अमनकुमार मास्के र काठमाडौँको ७ (ख) बाट निर्वाचित प्रकाश श्रेष्ठले प्रदेश सभा सदस्य पदबाट सोमबारबाट लागु हुने गरी राजीनामा दिनुभएको थियो । 

त्यसै गरी सिन्धुपाल्चोक क्षेत्र नं २ (क) बाट निर्वाचित नेपाली कम्युनिस्ट पार्टी (नेकपा) का युवराज दुलाल, काठमाडौँको ७ (क) बाट निर्वाचित नेकपाका वसन्तप्रसाद मानन्धर र काठमाडौँको २ (क) बाट निर्वाचित राष्ट्रिय प्रजातन्त्र पार्टीका सुनील केसीले सोमबार उपसभामुख अप्सरा चापागाईंसमक्ष सोमबार राजीनामा बुझाउनुभएको थियो । दुलाल तत्कालीन नेकपा माओवादी केन्द्रबाट र मानन्धर तत्कालीन नेकपा एकीकृत समाजवादीबाट प्रदेश सभा सदस्यमा निर्वाचित हुनुभएको थियो । प्रदेश सभा सदस्यबाट राजीनामा दिने केसीबाहेक पाँच जना प्रदेशका पूर्वमन्त्री हुनुहुन्थ्यो ।