बिष्णुप्रसाद पोखरेल
दमक, माघ ८ गते । झापा क्षेत्र नम्बर ५ बाट प्रतिनिधिसभा सदस्यका उम्मेदवार बनेसँगै नेकपा (एमाले) का अध्यक्ष एवं पूर्व प्रधानमन्त्री केपी शर्मा ओली र राष्ट्रिय स्वतन्त्र पार्टी (रास्वपा) का नेता तथा काठमाडौँ महानगरपालिकाका निवर्तमान मेयर बालेन्द्र साह (बालेन) सँग अहिले स्थानीयले तस्बिर लिने क्रेज बढेको छ ।
झापा निर्वाचन ५ बाट उहाँहरुको उम्मेदवारी घोषणा भए यता दुबै नेतासँग भेटघाट र तस्बिर खिचाउने सर्वसाधारण, कार्यकर्ता र समर्थकहरूको घुइँचो थामी नसक्नुभएको छ । घरदैलो कार्यक्रमभन्दा पनि ‘भेटेर फोटो खिचाउने लाइन’ लामो देखिन्छ । बिहानदेखि राति अबेरसम्म फोटो खिचाउनेको ओइरो लागेपछि दुबै नेताको सचिवालयलाई समय व्यवस्थापन, भिड नियन्त्रण र सुरक्षा समन्वयमा हम्मे परेको छ ।
अध्यक्ष ओली र साह दुवैको लोकप्रियता फरक आधारमा स्थापित छ । ओली अनुभवी नेता हुनुहुन्छ, पटक–पटक प्रधानमन्त्री भई सक्नुभएको छ । एमालेको केन्द्रीय नेतृत्व सम्हालिरहेका र स्थापित राजनीतिक धारका प्रतिनिधिको रूपमा उहाँलाई हेरिएको छ ।
अर्कोतर्फ, बालेन्द्र साह पछिल्लो समय वैकल्पिक राजनीति, युवाको आकाङ्क्षा र परम्परागत सोचलाई चुनौती दिने व्यक्तित्वका रूपमा देखिनुभएको छ । यही फरक राजनीतिक पृष्ठभूमिका कारण झापा–५ राष्ट्रिय तथा अन्तर्राष्ट्रिय चासोको विषय बनेको छ ।
जेनजी आन्दोलनका क्रममा ओलीको झापास्थित बासस्थानमा तोडफोड र आगजनी भएको छ । उहाँ हाल एक होटलमा बस्दै आउनुभएको छ । सोही होटल अहिले भेटघाट र फोटो खिचाउनेहरूको केन्द्र बनेको छ । अर्कोतर्फ, बालेन्द्र साह नयाँ स्थापना गरिएको चुनावी सचिवालयबाट चुनावी गतिविधि सञ्चालन गरिरहनु भएको छ ।
ओली र साह वरिपरि चर्चा केन्द्रित हुँदा अन्य उम्मेद्वारहरू केही हदसम्म ओझेलमा परेका छन् । स्थानीय चोक तथा चिया पसल, सामाजिक सञ्जाल र सञ्चार माध्यममा हुने बहसको केन्द्र पनि प्रायः यी दुई नेतामै सीमित भइरहेको देखिन्छ । झापा–५ मा देखिएको यो माहोलले आगामी निर्वाचन परिणामलाई थप चासोको विषय बनाएको छ ।
फोटो खिचाउनेको घुइँचो, भेटघाटको चाप र निरन्तरको राष्ट्रिय चर्चा हेर्दा, यसपटक झापा–५ को चुनाव केवल स्थानीय प्रतिस्पर्धामा सीमित नरही राष्ट्रिय राजनीतिक बहसको केन्द्र बनेको छ । नेकपा (एमाले) को झापा जिल्ला सचिव तुलसी कार्कीका अनुसार सामूहिक तथा एकल फोटो खिचाउनेहरूको सङ्ख्या अधिक रहेको छ । बालबालिका, युवादेखि लिएर सबै समुहका मानिसहरू फोटो खिचाउन आउने गरेका छन् ।
