जनार्जन खत्री
सर्लाही, माघ ७ गते । अन्तर्राष्ट्रिय संस्था लायन्स क्लब इन्टरनेसनलले सर्लाहीको लालबन्दीमा सञ्चालित सामुदायिक परोपकार आँखा उपचार केन्द्र (अस्पताल) लाई बुधबार आधुनिक उपकरण हस्तान्तरण गरेको छ ।
मधेश प्रदेशका मुख्यमन्त्री कृष्णप्रसाद यादवको प्रमुख आतिथ्यतामा क्लबले लालबन्दी नगरपालिका –५, जरुवापानीमा सञ्चालित आँखा उपचार केन्द्रको स्तरोन्नतिका लागि दुई करोड २० लाख २१ हजार ८६० रुपियाँ बराबरको अत्याधुनिक उपकरण हस्तान्तरण गरेको हो ।
सहयोग गरिएको उपकरणहरूमा आँखाको अप्रेसन गर्न मिल्ने फेको सर्जरी मेसिनसहित माइक्रोस्कोप, ल्याम्पलगायत रहेका छन् । लायन्स क्लब इन्टरनेशनल फाउन्डेसनबाट प्राप्त रकमले आँखा उपचार केन्द्रका लागि उपकरणहरू सहयोग गरिएको हो ।
मुख्यमन्त्री यादवले लायन्स क्लबबाट प्राप्त उपकरणले मधेश प्रदेशको मुटुको रूपमा परिचित र मध्यभाग समेत पर्ने लालबन्दीमा आँखाका बिरामीका लागि राहत मिलेको बताउनुभयो ।
अत्याधुनिक उपकरणले लालबन्दी मात्र नभइ मधेश प्रदेशका अन्य जिल्ला र भारतीय नागरिकलाई समेत लाभ मिल्ने मुख्यमन्त्री यादवको विश्वास छ । उहाँले मधेश प्रदेशको स्वास्थ्य क्षेत्रमा धेरै बेथिति रहेको उल्लेख गर्दै आफू सरकारमा रहँदासम्म सुधारका लागि प्रयास गर्ने प्रतिबद्धता व्यक्त गर्नुभएको छ ।
यस्तै, मधेश प्रदेश सरकारका स्वास्थ्य तथा जनसङ्ख्यामन्त्री जङ्गीलाल रायले आँखा उपचार केन्द्रका लागि लायन्स क्लबले प्रदान गरेको उपकरण सञ्चालन गर्न सक्ने क्षमता भएका प्राविधिक प्रदेश सरकारको तर्फबाट उपलब्ध गराउने प्रतिबद्धता व्यक्त गर्नुभयो । स्वास्थ्य मन्त्री रायले लालबन्दीमा ट्रमा सेन्टर स्थापनाका लागि आवश्यक बजेट विनियोजन गर्ने घोषणा गर्नुभएको छ ।
मधेश प्रदेश सभा सदस्य एवं पूर्वमन्त्री बेची लुङ्गेलीले लायन्स क्लबबाट प्राप्त उपकरणको सही सदुपयोग गरी यस क्षेत्रको आँखा रोगीलाई नियमित सेवा पाउने व्यवस्था मिलाउन आग्रह गर्नुभयो । सामुदायिक परोपकार आँखा उपचार केन्द्रमा अहिलेसम्म आँखाको परीक्षण र चश्मा वितरण मात्र हुँदै आएकोमा अब अत्याधुनिक मेसिन (फेको प्रविधि) मार्फत शल्यक्रिया गर्न मिल्नेगरी उपकरण उपलब्ध गराएको छ ।
लायन्स क्लब इन्टरनेसनलका पूर्व काउन्सिल चेयरपर्सन भरतप्रसाद ढुङ्गेलले काठमाडौँको तिलगङ्गाझैँ लालबन्दीमै आँखाको उपचार र शल्यक्रियाको व्यवस्था गर्न लागिपरेको बताउनुभयो ।
अत्याधुनिक मेसिनहरु प्राप्त भएसँगै दक्ष चिकित्सक र प्राविधिकहरू राखेर सर्लाही, महोत्तरी, रौतहट, सिन्धुली तथा भारत विहारका करिब १० लाख मानिसलाई आँखा उपचार सेवा प्रदान गर्ने लक्ष्य रहेको लायन्स क्लब लालबन्दीका पूर्व अध्यक्ष राजकुमार न्यौपानेले जानकारी दिनुभयो ।
उपकरण हस्तान्तरण कार्यक्रममा लायन्स क्लब इन्टरनेसनलका डाइरेक्टर बालकृष्ण बुर्लाकोटी, लालबन्दी नगरपालिकाका प्रमुख वासुदेव अधिकारी, हरिपुर नगरपालिकाका प्रमुख गोपाल पञ्जियार, पूर्व स्वास्थ्य राज्यमन्त्री राम सिंहलगायतले मन्तव्य राख्दै स्थानीयस्तरमै सुविधायुक्त आँखा अस्पताल सञ्चालनको तयारी भइरहेको प्रति खुसी व्यक्त गर्नुभयो ।
