बुखारेस्ट, पुस १९ गते । रोमानियाको आपतकालीन विभागले ब्रासोभ जिल्लामा इन्धन चुहावटका कारण करिब ११ हजार बासिन्दालाई पिउने पानी आपूर्ति हुन नसकेको जनाएको छ । आपतकालीन टोलीले प्रभावित समुदायमा तत्काल पिउने पानी वितरण गरिरहेका छन् ।
ब्रासोभ जिल्ला आपतकालीन कार्यालयले भिक्टोरिया शहर र वरपरका गाउँ उचेआ, भिस्टेआ र ड्रागुसमा सहयोग पुर्याइरहेको छ । डिसेम्बर महिनाको अन्त्यमा भएको यस वातावरणीय घटनाका कारण चारै स्थानीयतामा पानीको मुख्य स्रोत प्रदूषित भएको थियो ।
अत्यावश्यक सेवालाई प्राथमिकता दिँदै टोलीले भिक्टोरियाको नर्सिङ होम, स्थानीय अस्पताल र नगर कार्यलयलाई पिउने पानी उपलब्ध गराएका छन् । स्थानीय अधिकारीले वैकल्पिक पानीका स्रोत तुरुन्त सुनिश्चित गरेका थिए । आपतकालीन सेवा तथा आन्तरिक मन्त्रालयका टोली प्रभावित समुदायलाई निरन्तर सहयोग पुर्याउन तत्पर रहेका छन् । रासस/सिन्ह्वा
-original-thumb.jpg)